Енді жүргізуші куәлігін алғаш рет алатын азаматтар «Мобильді ХҚКО» қосымшасы арқылы мамандандырылған халыққа қызмет көрсету орталығына емтихан тапсыруға өтініш беріп, кезекті алдын ала брондай алатын болады. Бұл жанашылдық уақыт үнемдеуге әрі Мамандандырылған халыққа қызмет көрсету орталықтарында (МХҚКО) қызмет алушылардың санын азайтуға септігін тигізеді.
Ол үшін қолданушыға «Мобильді ХҚКО» қосымшасында «Бейне қызметті» таңдау керек. Бұл сервис азаматты алғашқы ақпарат алу үшін МҚКО операторымен байланыстырады. Одан кейін клиентке мемлекеттік бажды төлеуге немесе алдын ала төленген түбіртекті ұсынуға мүмкіндік беріледі. Төлем жасалғаннан кейін қосымшада №073/у формадағы медициналық анықтаманың, автомектепті аяқтағаны туралы куәліктің, қызмет алушы суретінің сканерленген нұсқалары және талапқа сәйкес қойылған қолтаңба сұралады. Оператормен сөйлесу барысында аталған барлық құжатты диалог терезесінде тіркеу қажет. Айта кететін жайт, азамат өтінішті сәтті тапсырғаннан кейін, МХҚКО-ға алдын ала кезекті брондау үшін емтихан тапсыратын күн мен уақытын таңдау ұсынылады.
«Бұрын емтихан тапсыратын азаматтар өтініш беру және төлем жасау үшін МХҚКО-ға баруға мәжбүр болатын. Енді бұл қызметті үйден шықпай, онлайн алуға болады. Яғни, бейнеқоңырау арқылы өтініш беріп және кезекті алдын-ала брондайды. Одан кейін клиент МХҚКО-ға бекітілген уақытта келіп, емтиханын тапсырып кете береді. Болашақта өтініш беру фнкциясын электронды порталға және екінші деңгейлі банктердің ақпараттық жүйелеріне енгізу жоспарда бар», – деді «Азаматтарға арналған үкімет» мемлекеттік корпорациясы КЕАҚ Басқарма Төрағасы Сүйеніш Әбділдин.
Айта кетейік, аталған қызметті eGov mobile қосымшасында да алуға болады. Ол үшін басты беттегі «БейнеХҚКО» батырмасын таңдау қажет.
