Кеген ауданының Саты ауылы маңында жол апаты болып, салдарынан бір адам қаза тапты, бірнеше адам зардап шекті.
Алматы облыстық Полиция департаментінің дерегінше, қайғылы оқиға кеше Саты ауылынан Қайыңды көліне баратын тау жолында болған.
«5 қазан күні сағат 14:40 шамасында Кеген ауданы Саты ауылдық округінің аумағында, «Қайыңды-Саты» таулы автожолының 9 шақырымында 47 жастағы автобус жүргізушісі жолдың қарсы бағытына шығып, 1997 жылғы жүргізуші басқарып келе жатқан «УАЗ» автокөлігімен соқтығысқан, – деп жазды Полиция департаментінің бастығы Бауыржан Әленов Instagram парақшасында.
Алматы облыстық әкімдігінің хабарлауынша, жол апаты салдарынан 36 жастағы жолаушы оқиға орнында қаза тапты.
Зардап шеккен барлық 34 адам – 20 әйел мен 14 ер адамға тиісті жедел медициналық көмек көрсетілді. Оқиға орнына 13 жедел жәрдем бригадасы және 1 жолдағы дәрігерлік-құтқару пункті бригадасы (28 қызметкер және 14 санитарлық автокөлік бірлігі) жіберілген. Қазіргі уақытта 1 адам Кеген аудандық ауруханасында, 2 адам Шелек ауылының аудандық ауруханасына, 9 адам Алматы көпсалалы клиникалық ауруханасына емдеуге жатқызылған, жағдайлары орташа ауыр.
Бұл оқиға бойынша Кеген ауданының полиция бөлімі Қылмыстық кодекстің 345-бабының 3-бөлімінде көзделген қылмыстық құқық бұзушылық белгілері бойынша іс қозғады.
Қазіргі уақытта осы жол-көлік оқиғасының барлық мән-жайын шынайы түрде зерттеу үшін сараптама тағайындау бойынша тергеу амалдары жүргізіліп жатыр. Автобус жүргізушісі қамауға алынды.
Істі тергеу барысын Полиция департаментінің басшысы өз бақылауына алды.
