Бәсекелестікті қорғау және дамыту агенттігі абоненттердің тарифтердің қымбаттауы туралы шағымынан кейін ұялы байланыс операторларының 2023 жылғы қызметін тексергенін хабарлады. Тексеру нәтижесінде олардың биыл тарифтік жоспарлар бағаларын 7,7%-дан 57,3%-ға дейін қымбаттатқанын анықтады.
Атап айтқанда, тек 2023 жылдың мамыр-шілде айлары аралығында ұялы байланыс операторлары өз ресми сайттарында хабарлап, ай сайынғы абоненттік төлеммен 30-дан астам тарифтік жоспарда көрсетілетін қызметтердің құнын бірінен соң бірі көтеріп отырған.
«Осыған байланысты, Кәсіпкерлік кодекстің 199-бабының 3-тармағын ескере отырып, бір күнтізбелік жылда бәсекелестікке қарсы келісілген іс-әрекеттер белгілерінің қайта анықталуына байланысты Агенттік Кәсіпкерлік кодекстің 170-бабы бойынша «Кселл» АҚ, «МТ–С» ЖШС (Tele2/Altel) және «Кар-Тел» ЖШС (Beeline) ұялы операторларына қатысты тергеп-тексеруді бастады», – делінген құзырлы мекеме хабарламасында.
Бұдан басқа, бұған дейін Агенттік ұялы байланыс операторларының бір минуттық сөйлесулердегі қоңыраулардың құнын және тарифтік жоспарлардағы бір SMS-ті белгілеу жөніндегі әрекеттерінде (көрсетілген қызметтердің бір бірлікке тарифтелуі көзделген) бәсекелестікке қарсы келісілген іс-қимылдардың белгілерін (Кәсіпкерлік кодекстің 170-бабы) анықтаған болатын. Осыған байланысты ұялы байланыс операторларына бағаны негізді төмендету жолымен анықталған белгілердің тоқтатылғаны туралы хабарлама жіберілді.
Ведомство ұялы байланыс операторлары хабарламаны белгіленген мерзімде орындамаса, тексеру жүргізілетінін ескертті.
