Өңірде туберкулезге қатысты эпидемиологиялық ахуал тұрақты. Бұл туралы Өңірлік коммуникациялар қызметінде Алматы облысының фтизиопульмонология орталығы мониторинг және бағалау бөлімінің басшысы Эльмира Базарбаева мен балалар жөніндегі координаторы Жанар Бүйенбаева баяндады.
Маманның айтуынша, жұқпалы аурудың таралуы 0,7 пайызға, өлім көрсеткіші 14,3 пайызға төмендеген. Былтыр амбулоториялық емге 506 науқас жіберілген.
Жалпы, өңірде 14 бактериоскопия зеттеу орталығы жұмыс істейді. Сонымен қатар, 8 G-Xpert құрылғысы бар. Оның 5-еуі 2 модульді және 3-еуі 4 модульді. Құрылғылар Жамбыл, Қарасай, Райымбек, Еңбекшіқазақ, Іле, Ұйғыр аудандары мен Қонаев қаласының ауруханасында.
«Туберкулез анықталған жағдайда емдеудің толық курсынан өту қажет. Аурудың алдын алу үшін салауатты өмір салтын ұстанып, дұрыс тамақтану қерек. Сонда иммундық жүйе нығая түседі. Уақытылы медициналық тексеруден өту кез келген қауіптен сақтайды», – деді Эльмира Базарбаева.
Брифинг барысында Жанар Бүйенбаева балалар арасында сырқаттану көрсеткіші тұрақты екенін айтты. Мәселен, өткен жылмен салыстырғанда 7,3 пайызды көрсетіп, бір деңгейде қалып отыр.
«Былтыр балаларда туберкулездің күрделі және ауыр түрлері кездескен жоқ. Дертті ерте сатыда анықтау шаралары тұрақты орындалып келеді. Нәтижесінде ауруға шалдыққан балалардың 80 пайызына дер кезінде диагноз қойылып, емдеу басталды. Бұл көрсеткіш өткен жылмен салыстырғанда жақсарды»,- деді Жанар Бүйенбаева.
Жанар Бүйенбаеваның сөзінше, туберкулездің алдын алудың алғашқы және өте маңызды қадамы туберкулезге қарсы екпе болып саналады. Бұл екпе әрбір жаңа туған дені сау нәрестеге перзентханада 2-4 күн ішінде егіледі.
