Қарағанды және Павлодар өңірлерінде болған қайғылы оқиғалардан кейін облыс аумағында осындай фактілерге жол бермеу мақсатында Алматы облысының прокуратурасы Кеген ауданындағы «Тұйық» қорғасын кен орнының ұңғымасында тау-кен жұмыстарын жүргізу кезінде өнеркәсіптік қауіпсіздік нормаларын бұзу деректерін анықтады.
Тексеру барысында шахта бекіністерінің деформациясы мен зақымдануы, шатыр мен борттар бойынша тау массасы бөліктерінің қатып қалуы, сондайақ, жобалау құжаттамасынан ауытқу және бекіту материалы паспорттарының және өзге де орындаушылық құжаттаманың болмауы анықталған. Анықталған заңбұзушылықтар 25 кеншінің өмірі мен денсаулығына зардап әкелуі мүмкін және нақты құлау қаупін тудырады. Осыған байланысты прокуратураның үйлестіруімен өнеркәсіптік қауіпсіздік департаменті тарапынан жер қойнауын пайдаланушыға қатысты Әкімшілік құқықбұзушылық кодексінің 298-бабымен (жұмысты қауіпсіз жүргізу жөніндегі қағидаларды бұзу) іс қозғалып, анықталған заңбұзушылықтарды жою туралы нұсқама берілген. Сонымен қатар МАЭС шешімімен ықтимал теріс салдарларды болдырмау мақсатында шахтаның қызметі анықталған заңбұзушылықтар жойылғанға дейін тоқтатылды.
Алматы облысының прокуратурасы
