Былтыр Қонаев қаласының Бас жоспары бекітілді. Аталған құжатқа сәйкес, Абай көшесі арқылы Арна мен 10-шағын ауданды жалғастыратын жол салынып жатыр. Мердігер – «Асар строй» ЖШС.
Бұл көшенің ұзындығы 14,3 шақырымды құрайды. Алдын ала бекітілген жобалық-сметалық құжатқа сай, жаңадан түсетін жолдың бойындағы инженерлік желілер түгелдей ауыстырылып, жаңартылады. Оның ішінде газ құбыры мен электр желілері бар. Ал көшенің өзі 4 жолақты болмақ. Жол бойында бақ орналастыру да көзделіп, абаттандыру да қарастырылған. Сонымен қатар шағын аудандардың ішіндегі 12 көшенің жолына ағымдағы жөндеу жасалады. Жобаның аяқталу мерзімі 2025 жылға жоспарланған. Қазір мұнда 39 ауыр техника мен 45 адам қызмет етуде.
Жолаушылар көлігі және автомобиль жолдары бөлімінің басшысы Бағдат Алиевтің сөзінше, аталған ықшам аудандарда сазды аумақтар көп болғандықтан, жолдың биіктігін көтеріп, жартасты тастар төселіп жатыр. Бұл – асфальттың шөгіп кетуінің алдын алады. Көше бойынан жаңбыр, қар суы кедергісіз ағып өту үшін арықтар немесе су арнасын салу қажет. Ол үшін арнайы жоба әзірленуде.
Естеріңізге сала кетейік, бұған дейін қаладағы 10 көшенің күрделі жөндеуден өтетіні туралы хабарлағанбыз.
Қонаев қаласы әкімдігінің баспасөз қызметі
