Қарасай өңірінде аудандық әкімдіктің қолдауымен қоғамдық көліктерді жаңарту жұмыстары кезең-кезеңімен жүзеге асырылуда. Осыған орай Қаскелең қаласының ішімен жүретін және Елтай ауылдық округіне қарасты Исаев ауылына қатынайтын автобустар жаңарды.
Атап айтқанда, №1, №2А және №9 маршруттары бойынша кең де ыңғайлы автобустар жолаушыларға қызмет көрсете бастады. Қоғамдық көліктер жаңарып қана қоймай, қатынау арақатынасы да жиілей түскен. Бұл жерде аталған автобустарды сатып алу Қарасай аудандық әкімдігінің субсидиялық көмегінің арқасында жүзеге асқанын айта кету керек.
– Бүгінге дейін жолаушылар тасымалымен «Hyundai County» маркалы автокөліктері айналысса, енді бұл қызметті «Dongfeng» маркалы автобустары атқаратын болады, – дейді Қаскелең автопаркінің қызметкері Ерасыл Айтмұхаметов. – Мұның сыртында әр маршрутқа бір-бір автобустан қосылып отыр. Егер бүгінге дейін №1 және №2А бағыттары бойынша үш автобус жүрген болса, енді олардың саны 4-ке жетіп отыр.
Жолаушылар тасымалын жақсартып, адамдардың жол жүру машақатын азайту мақсатында «AlemPay» ақы төлеу жүйесі орнатылған. Жолақыны аталған компанияның және өзге де банктердің картасымен немесе QR-кодтың көмегімен төлеуге мүмкіндік береді. Үш бағыт бойынша кесімді жолақы құны белгіленген. Мысалы, №9 бағытында қатынау құны 150 теңге болса, Қаскелең қаласының ішінде жүретін №1, №2А автобустарының билет құны – 80 теңге. Ал оқушыларға 50 пайыз жеңілдік қарастырылған.
Қуат Қайранбаев,
Қарасай ауданы
