Талай жанның жүрегінен орын алып, таланымен тамсандырған астаналық «Жастар» театры Қонаев қаласына да келіп, тұрғындарды өнерімен тәнті етті. Мәдениет үйінде театр ұжымы «Жанарымдағы жалғыз әуен» атты музыкалық қойылымын сахналады. Идея авторы және қоюшы режиссері – Қазақстанның ербек сіңірген қайраткері Нұрқанат Жақыпбай. Халық әндерінен бастап шетелдің танымал шығармалары да жанды дауыста аспаптардың сүйемелдеуімен шырқалып, әсем әуенге қойылған классикалық би де қойылымның көркін аша түсті.
Атауының өзі адамды бірден еліктіреді. Өткен күннің ыстық естеліктері мен көркем көрінісі адам жанында өшпестей мәңгі сақталады. Сол бір ғажап сәттердің елесін адам әуезді әуеннен, көркем поэзиядан іздейді. Қайталанбас кезеңге деген сағыныш өнер болып өріліп, өмірге қайта келгендей, өткен күнге қайта тап болғандай әсер қалдырады.
Актерлердің шеберлігі, әр әуенді жүрегімен сезініп, жандүниесімен бірге тербелген әр қимылы да ғажап үйлесіммен көңіліңе нұр құйғандай болады. Ал олардың жанарында өнерге деген құрметі, көрерменге деген шексіз махаббаты, театрға жан-тәнімен берілгендігі айқын көрініп тұрды.
Қойылым аяқталған соң таң-тамаша болған көрермен толассыз қошемет көрсетіп, ризашылығын білдіріп жатты. Керемет әсерден көзіне жас алғандар да болды. Жүректен шыққан, жанарда сақталған әуен жүрекке жетті.
Гүлзат БАЙҚОНЫСОВА
