Рәміз – халқымыздың рухын, ұлттық санасын, қаһармандығы мен даналығын, болашаққа үмітін, арман-тілегін жеткізетін ерекше құнды белгі. Кез-келген мемлекеттің көркейіп, гүлденуі сол мемлекеттің төл рәміздеріне деген құрмет сезімінен өрбиді. Биыл мемлекеттігіміздің символдарының қабылданғанына 32 жыл.
Кеген ауылының орталық алаңында Қазақстан Республикасының рәміздер күні мерекесіне арналған «Менің туым – мақтанышым» атты патриоттық шара өтті. Мерекеге мемлекеттік қызметкерлер, аудандық Жастар ресурстық орталығының мамандары, оқушылар және аудан тұрғындары қатысты. Мерекелік шарада әуелі Қазақстан Республикасының Мемлекеттік Туы мен Елтаңбасы ұлықталып, Мемлекеттік әнұран шырқалды.
Ту тұғырын көтеру рәсіміне аудан әкімі Нұрбақыт Теңізбаев, аудандық ақсақалдар алқасының төрағасы Сабыр Досымбеков, аудандық мәслихаттың төрағасы Алмасбек Нөкербанұлы, 2011 жылғы Азия ойындарының күміс жүлдегері, 2012 жылы жастар арасында ҚР қола жүлдегері, 2013 жылы ҚР чемпионатының күміс жүлдегері, «Спорт саласы үздігі» медалінің иегері, Кеген ауданының балалар мен жасөспірімдер спорт мектебінің директоры, аудандық мәслихат депутаты Азамат Дүмбіров қатысты.
Аудан әкімі Нұрбақыт Теңізбаев айтулы мерекемен құттықтап, ыстық лебізін білдірді.
– Баршаңызды мемлекеттік рәміздер күнімен құттықтаймын! Тәуелсіздігіміздің тұмарына айналған мемлекеттік рәміздеріміз болашаққа бастаған ұлы көшімізді демеп, игі істерімізді қолдай берсін! Бірлігіміз жарасып, еліміздің жарқын болашаққа бастар жолында нық қадам жасап, ынтымағы жарасқан ел болайық! Әрдайым еліміз тыныш, халқымыз аман, рәміздеріміздің мәртебесі биік болсын!- деген аудан басшысы Мемлекеттік рәміздердің қадір- қасиетін арттыру, жас ұрпақты отансүйгіштікке тәрбиелеуге бағытталған жұмыстардың ешқашан құны төмендемеуі қажеттігін баса айтты.
Іс-шара барысында Кеген ауданының балалар мен жасөспірімдер спорт мектебінің директоры Азамат Дүмбіров, Кеңес Нұрпейісұлы атындағы мектеп-лицейінің 10 сынып оқушысы Шұғыла Нұрмаманқызы Рәміздердің тарихы туралы баяндамасын оқып, көпшілікті мерекемен құттықтады. Қазақстан Республикасы Мемлекеттік рәміздерінің шығу тарихын Садуақас Серкебаев атындағы мектеп гимназиясының білімгерлері таныстырып өтті.
Мерекелік іс-шара одан әрі мәдениет қызметкерлерінің ұйымдастыруымен «Мемлекеттік рәміздер-ұлттық мақтаныш» атты патриоттық ән кешіне ұласты.
Дәурен Әбутәліпов,
Кеген ауданы
