Алматы облысында қадағалаушы органның жол жөндеуге қатысты шешімін орындамағаны үшін басқарма басшылары жауапқа тартылды. Бұл туралы Алматы облыстық прокуратурасы хабарлады.
Құзырлы органның ақпараты бойынша, Алматы облысының әкімдігі 15 млрд теңгеге жолды күрделі жөндеу бойынша конкурста жеңімпаздың анықталғанына қарамастан, мемлекеттік сатып алудан заңсыз бас тартып, жаңа жеңімпазды анықтау үшін конкурс жариялаған. Осылайша, кәсіпкердің құқықтарына нұқсан келтірген.
Бұдан соң кәсіпкер прокуратураға шағымданған. Прокуратура ол бойынша қадағалау актісімен қайталама конкурсты тоқтатып, әкімдікке бастапқы конкурс жеңімпазымен шарт жасасуды ұсынған.
Алайда әкімдік сот шешімі мен прокуратураның қадағалау шараларына қарсы конкурс жариялаған.
Кәсіпкерлік қызметке заңсыз араласқаны және прокурордың ұсынуы бойынша шаралар қолданбағаны үшін облыс әкімдігінің екі басқарма басшысы ҚР ӘҚБтК-нің 173 және 664-баптары бойынша әкімшілік жауапкершілікке тартылды.
Мемлекет басшысы кәсіпкерлердің құқықтарын қорғауды мемлекеттік аппараттың басым бағыттарының бірі деп атап өтті.
