ҚР Парламенті Мәжілісінің депутаты Максим Рожин және мәслихат депутаттары мен саяси ұйым өкілдерінен құралған АЭС салуды қолдау жөніндегі Халықтық штаб мүшелерімен №28 мектеп гимназиясының мәжіліс залында Іле ауданындағы Байсерке ауылдық округінің тұрғындарымен кездесті.
Кездесуде экологиялық және экономикалық проблемаларды шешу жолында АЭС жобасының тиімділігі жөнінде пікір білдіріп, ауыл тұрғындарын 6 қазан күні өтетін референдумда дауыс беруге шақырды. Максим Рожин өз сөзінде қазіргі таңда климаттық және экологиялық өзгерістердің орын алуына байланысты жел мен күн арқылы алынатын энергия көздерінің тұрақсыздығына назар аударды.
«Күн және жел электр станциялары ауа райы жағдайына тәуелді және тұрақты энергиямен қамтамасыз ете алмайды. Сонымен бірге экологиялық стандарттарды нығайту көмір мен газ өндіруді дамытуға шектеулер тудырады. Бұл жағдай жаңа тұрақты және экологиялық таза энергия көзінің қажеттілігін тудырады. Атом электр станциясы бұл мәселенің бірден-бір шешімі болуы мүмкін. Атом электр стансасы 60 жылдан астам тұрақты энергиямен қамтамасыз етуге қабілетті. АЭС құрылысы энергетика мен өнеркәсіп өндірісін әртараптандыруға ықпал етеді», – деді ол.
Кездесу барысында атом электр стансасы – көмірқышқыл газының шығарындыларын және көмірге тәуелділікті азайтудың ең тиімді жолдарының бірі екені айтылды. Сондай-ақ АЭС-тің көмір стансаларынан айырмашылығы жіктеліп, атом энергиясы табиғатқа зиян келтірмейтіндігі және экономикамыздың дамуына тың серпін беретіндігі сөз болды.
Өңірлік Халықтық штабтың баспасөз қызметі
