Қонаев қаласындағы орта мектеп-гимназиясында сөз өнеріндегі шоқтығы биік қос тұлға, қазақ әдебиетінің тұғырын шыңдаған қаламгерлер – Бердібек Соқпақбаев пен Әбдіжәміл Нұрпейісовтің 100 жылдық мерейтойына орай облыстық мәнерлеп оқу байқауы өтті. Мақсаты – қазақ әдебиетіне өзгеше өрнек, ғажайып сыр-сипат алып келген көрнекті жазушылардың шығармашылығын дәріптеу, қатысушылардың ойлау қабілеттерін, көркем жеткізе білу дағдыларын дамыту.
Байқауды ашқан облыстық тілдерді дамыту жөніндегі басқарманың басшысы Данияр Ахметов шараның мақсат-міндетіне тоқталып өтті.
– Облыстық тілдерді дамыту басқармасының екі бағыты бар. Бірі – ономастика. Екіншісі – тілдерді дамыту. Бүгінгі шара тілді дамыту мақсатында қазақ әдебиеті алыптарының мерейтойына арналып, ұйымдастырылып отыр, – деген басқарма басшысы қатысушыларды Бердібек Соқпақбаев пен Әбдіжәміл Нұрпейісов туралы мағлұматтарға қанықтырды.
Аталған қос тұлғаның шығармашылығына арналған байқаудың бірінші кезеңінде қатысушылар балалар әдебиетінің бәйтерегі Бердібек Соқпақбаевтың, екінші кезеңінде Халық жазушысы Әбдіжәміл Нұрпейісовтің кез келген шығармасынан үзіндіні жатқа, мәнерлеп оқыды.
Қазылар алқасы бағалау кезінде қатысушының жатқа оқу қабілетіне, мәнеріне, тіл тазалығына, сахна мәдениетіне мән берді.
Байқау қорытындысында Бердібек Соқпақбаевтың шығармаларын мәнерлеп оқу бойынша Қонаев қалалық орта мектеп-гимназиясының 11-сынып оқушысы Ерасыл Дәулетбай бас жүлдені жеңіп алды. Іле ауданынан келген Маржан Байларова 1-орынды иеленсе, кегендік Баян Сәлім мен қонаевтық Фариза Неғметолла 2-орынды өзара бөлісті. Жамбыл ауданынан Балнұр Төлеева мен Талғар ауданынан келген Ғабит Дайынов 3-орынды еншіледі. Сонымен қатар Әбдіжәміл Нұрпейісовтің шығармаларын мәнерлеп оқудан Талғар ауданының атынан қатысқан Жансая Бағашар бас жүлдеге ие болды. Райымбек ауданының намысын қорғаған Назерке Сейдуақас 1-орынды олжаласа, Жамбыл ауданынан келген Аяулым Ералы мен балқаштық Толғанай Нұрахан 2-орын тұғырынан көрінді. Ілелік Кенжеғали Октябрь мен қарасайлық Жібек Бекзатқызы үздік үштікті түйіндеді. Бірқатар қатысушылар ынталандыру жүлдесін иеленді. Байқау жеңімпаздары дипломдар және ақшалай сыйлықтармен марапатталды.
Айжарық КӨПТІЛЕУОВ
