Аймақ басшысы алдымен Жапонияның Қазақстандағы Елшісі Джун Ямадамен жүздесті. Ол осынау маңызды қызметті 2021 жылы сәуір айынан бері атқарып келеді. Екі ел арасындағы достық қарым-қатынастың дамып жатқанын атап өткен Джун Ямада жуырда өзінің қызметтік міндетінің аяқталатынын хабардар етті. Сондай-ақ жаңадан тағайындалатын Елшінің Жапония мен Алматы облысы арасындағы ынтымақтастықты нығайту бағытындағы жұмысты жандандыра түсетініне сендірді.
Келесі кезекте Марат Елеусізұлы Эстонияның Елшісі Яап Орамен кездесті. Басқосу барысында екіжақты байланысты нығайтуға қатысты мәселелер егжей-тегжейлі талқыланды. Екі тарап та бірқатар салалар бойынша өзара тиімді ынтымақтастықты кеңейтуге ниетті екендіктерін аңғартты.
Яап Ора мырза бұрынғы Кеңес одағы құрамындағы көлемі жағынан кіші республиканың бірі болған Эстония Алматы облысынан жер көлемі мен халық саны жөнінен екі есе кіші екеніне назар аударды. Облыстың тоғыз жолдың торабында орналасуы өңір әлеуетінің артуына септігін тигізетініне сенімді екенін білдірді.
Өз кезегінде Марат Сұлтанғазиев Қонаев қаласының облыс орталығы мәртебесін иеленгеніне 2 жылдан асқанын, халықтың 84 пайызы ауылдық жерде тұратынын және тағы басқа қолға алынған жұмыстар жайын тілге тиек етті. Облыс басшысы Қонаев пен Алатау қалаларын дамыту бағытындағы жобаларды кеңінен әңгімелеп, дипломаттардың өңірге деген қызығушылықтарын жоғары бағалады.
Кездесуде ауыл шаруашылығы, туризм, шағын және орта бизнес, білім сияқты маңызды салалар бойынша қарым-қатынас орнату жайы сөз болды. Алматы облысы мен аталған мемлекеттер арасындағы сауда-экономикалық және аграрлы аймаққа инвестиция тартудың тиімділігі жан-жақты талқыланды.
Айжарық КӨПТІЛЕУОВ
