Қарасай ауданы Шамалған ауылындағы «Атамекен» тарихи-мәдени орталығында «Қазақ мемлекеттігінің тарихи мәселелері: Алтын орда мен Қазақ хандығы дәуірінен қазіргі кезеңге дейін» тақырыбында дөңгелек үстел өтті. Шараға ғалымдар, тарихшылар, өлкетанушылар қатысты.
Дөңгелек үстел барысында Ұлттық ғылым академиясының академигі, әл-Фараби атындағы ҚазҰУ-дың кафедра меңгерушісі Берекет Кәрібаев, Қазақстан тарихы кафедрасының аға оқытушысы Еділ Ноян, Сүлеймен Демирел университетінің аға оқытушысы, тарих ғылымдарының магистрі Роза Жылқыбаева өз пікірлерін ортаға салды.
Тарих ғылымдарының докторы Берекет Кәрібаевтың айтуынша, Алтын орда тарихының әлі де толық зерттелмеген тұстары бар. Соның бірі – Алтын орданың соңғы кезеңі. Сол дәуірдегі түркі тілдес халықтардың бай тарихи-эпикалық циклын зерттеуге де назар аудару қажет.
Қазір ғалымдар Жошы тұлғасы, Жошы ұлысы, түркі әлемі және Ұлытау тарихының өзегі аясында мәселе көтеріп, қолжазбалар жинақтауда. Қолға алынып жатқан осынау ауқымды жұмыс халқымыздың тарихи санасын жаңғыртуға зор үлес қосуы тиіс.
Басқосуда еліміздің тәуелсіздік жылдардағы негізгі жетістіктері, қоғамда тұрақтылықты сақтауға бағытталған мәселелер де айтылды. Тарихымызда қалған тау тұлғалар жайында да кеңінен сыр шертілді. Өткенімізді қайта жаңғыртып, ұлттық мүддеміз бен тарихи бейнемізді биікке көтеруде тарихтың алар орны зор.
Аяужан Сәдуақасова,
«Атамекен» тарихи-мәдени орталығының директоры
Қарасай ауданы
