Талғар ауданында Еуразиялық логистикалық паркінің алғашқы іргетасы қаланды. Парк Алматының Үлкен айналма автомобиль жолының (ҮААЖ) маңында 13 гектар аумаққа салынады. Бұл жүк көліктері үшін қолайлы жол қатынасын қамтамасыз етіп, жүктің Қазақстан мен шетелдерге жеткізілуін жеделдетеді, сондай-ақ импорт-экспорттық логистиканы жеңілдетеді.
Кешеннің құрамында жалпы аумағы 50 мың шаршы метрден асатын қойма ғимараттары, жүк және жеңіл көлікке арналған тұрақтар, әкімшілік-тұрмыстық ғимараттар болады. Жобаның жалпы инвестиция көлемі 22 миллиард теңгені құрайды.
Алматы облысының әкімі Марат Сұлтанғазиев жобаның маңыздылығын атап өтіп, Еуразиялық логистикалық парк Қазақстанның халықаралық саудадағы рөлін нығайтуға, көлік-логистикалық инфрақұрылымды дамытуға және ірі шетелдік инвесторларды тартуға мүмкіндік беретінін айтты. Оның сөзінше, жобаның инвестициялық көлемі 22 миллиард теңге, ал алғашқы 10 жылда күтілетін табыс — 50 миллиард теңге болмақ. Жоспар бойынша, пайдалануға беру кезеңінде 250 жұмыс орны ашылады, 700-ден астам жанама жұмыс орны қамтамасыз етіледі. Жоба 18 миллиард теңге көлемінде салық түсімін қамтамасыз етеді. 2029 жылға қарай Қазақстандағы А және В санатындағы қойма алаңдарын 4 миллион шаршы метрге дейін ұлғайту көзделген. Бұл инфрақұрылымдағы тапшылықты шешуге мүмкіндік береді.
