Алматы облысының орталығында үшінші «Алматы-Қонаев» марафоны өтті.
Шараны Алматы қаласының ардагер марафоншылар клубы Қазақстан Республикасының Тәуелсіздік күні қарсаңында ұйымдастырды. 12 адамнан тұратын ынтымағы жарасқан топ 67 шақырымдық қашықтықты бағындырды. Қатысушылар арасында атақты қазақстандық марафоншылар – КСРО спорт шебері, Мәскеудегі марафоннан әлем чемпионы атанған Алпыс Ермағамбетов; Қазақстан чемпионатының марафон ойындарынан 21 дүркін жеңімпазы Сексенбай Желдебаев болды.
Жарыстың қиын кезеңін еңсергендердің қатарында БҰҰ-ның бейбітшілік елшілері Қайырболат Егеубаев пен Салыбек Сүлейменов те болды. «Алматы марафоны ардагерлер клубы» ҮЕҰ директоры Әділ Әбішев іс-шараның тақырыбы бірлік пен татулықты білдіретінін, ал марафонды өткізу идеясы салауатты өмір салтын насихаттауға және физикалық әрі рухани жағынан дені сау ұрпақ тәрбиелеуге бағытталғанын атап өтті. Барлық марафон қатысушыларына лайықты марапаттар табысталды.
