Тәуелсіздік мерекесінде Балқаш ауданының орталығы Бақанас ауылында 5 қабатты 40 пәтерлі жалгерлік тұрғын үйдің кілті табысталып, кезекте тұрған тұрғындар баспаналы болды.
Шараға аудан әкімі Азат Құтпанбетов, ардагерлер кеңесінің төрағасы Бақыт Сқабаев, мәслихат төрағасы Кәдірбек Омаров, мекеме-ұйым басшылары мен ауыл жұртшылығы қатысты.
Салтанатты шарада алғашқы сөз кезегін алған Азат Үкітайұлы: «Тұрғын үй салу ісі ауданымызда қарқынды жүріп, жыл сайын тұрғындар баспаналы болу мүмкіндігіне қол жеткізуде. Бұл тұрғын үйдің құрылысы 2022 жылдың қараша айында басталған болатын. Ол үшін «Бауыр Құрылыс Компаниясы» жауапкершілігі шектеулі серіктестігімен келісімшарт жасалған. Бүгінде пайдалануға беріліп, ел қуанышы еселенуде. Баспаналы болып отырған пәтер иелеріне қоныстарыңыз құтты болып, осындағы әр күндеріңіз бақыт пен қуанышқа толы өтсін», – деген тілегін жеткізіп, тұрғын үй құрылысын жүргізген серіктестіктің директоры Эльмира Сатыбалдиеваға аудан халқы атынан алғыс айтты. Аудандық ардагерлер кеңесінің төрағасы Бақыт Сқабаев ақ батасын берді.
Мұнан соң қуанышты сәттерін тағатсыздана күтіп тұрған пәтер иелеріне баспана кілті салтанатты түрде табысталды. Жиналған көпшілік шашу шашып, мәре-сәре болып, бір-біріне құтты болсын айтып, қуанышқа ортақтасып жатты.
Баспаналы болу – әрбір адамның асқақ арманы, басты байлығы. Кім де болса шаңырағы биік, босағасы берік өз үйі болғанын қалайды. Сондықтан да дана халқымызда «Үйің болмай, күйің болмас», «Өз үйім, кең сарайдай боз үйім» деген сөздер айтылса керек.
Тәуелсіз мемлекетіміздегі азаматтардың әлеуметтік игілігі олардың тұрғын үймен қамтылуына тікелей байланысты. Бұл ретте «Тұрғын үй-коммуналдық инфрақұрылымды дамытудың 2023 – 2029 жылдарға арналған тұжырымдамасы» бекітілген. Демек, мемлекетіміздің негізгі қағидаты әлеуметтік әлжуаз топтағы тұрғындар үшін баспанаға қолжетімділікті арттыру болып қала бермек. Осы мақсатта мемлекет тарапынан халықты баспанамен қамтуға мүмкіндік беретін тұрғын үй бағдарламалары өз жалғасын таба береді деген сенімдеміз.
Бақтығали ДӘУІТБАЕВ
Балқаш ауданы
