Бүгінде еліміздегі мектептердің 90% инклюзивті білім алуға жағдай жасалған, ал балаларды арнайы психологиялық-педагогикалық қолдаумен қамту 85% – ға жетті. Биыл психологиялық-педагогикалық қолдаудың үш деңгейлі моделі енгізілді, ерекше қажеттіліктері бар балалармен жұмыс істеу үшін қолдау кабинеттері мен жеке бағдарламаларға жаңа талаптар әзірленді.
Мектептерде «педагог-ассистент» лауазымы енгізілді, бұл мамандар санын жылына 1 мыңнан 2,5 мыңға дейін арттыруға мүмкіндік берді. I, II топтағы мүгедектерге, бала кезінен мүгедектерге, мүгедек балаларға арналған техникалық және кәсіптік білім беру ұйымдарына оқуға түсу кезінде қабылдау квотасы 10%-ға ұлғайтылды.
Ерекше білім беру қажеттіліктері бар балаларды қолдаудың 96 кабинеті ашылды. 600-ден астам арнайы оқу бағдарламалары әзірленді.
Балалар құқығын қорғау
Балалар құқығы бұзылған жағдайда жедел ден қою үшін бақылау субъектілерінің ескертуінсіз жоспардан тыс тексерулер енгізілді. Осы жылдан бастап Балалар құқығын қорғау комитетінің бақылауға жататын объектілер тізбесін ұлғайту бөлігіндегі функциялары, сондай-ақ әкімшілік жауаптылыққа тарту жөніндегі өкілеттіктер кеңейтілді. Бала құқығы жөніндегі өңірлік уәкілдің мәртебесі мен өкілеттігі заң жүзінде бекітілген.
ҚР әйелдерінің құқығы мен балалардың қауіпсіздігін қамтамасыз ету мәселелері жөніндегі қабылданған заңының шеңберінде осы жылдың маусым айында балаларға қатысты кез келген зорлық-зомбылық көріністері үшін жауапкершілікті қатаңдататын нормалар енгізілді. «111» байланыс орталығының функциясы заңнамалық түрде бекітілді.
Елде 330-дан астам адам жетім балаларға тәлімгер болды. 692 бірлікке дейін қорғаншылық және қамқоршылық органдары мамандарының штат саны ұлғайтылды. Жетім балаларға арналған 36 ұйым балаларды қолдау орталықтарына айналды.
Мемлекет киім мен мектеп керек-жарақтарын сатып алу үшін 22,2 млрд теңгеден астам сомаға «Жалпыға бірдей оқыту» қорынан әлеуметтік осал отбасылардан шыққан 510 мыңнан астам балаға қолдау көрсетті. Көмек күнкөріс деңгейінен төмен табысы бар атаулы әлеуметтік көмек алатын отбасылардан шыққан мектеп оқушыларына, жетім балаларға және ата-анасының қамқорлығынсыз қалған балаларға, сондай-ақ төтенше жағдайлар нәтижесінде шұғыл көмек талап ететін отбасылардан шыққан мектеп оқушыларына жолданады.
Еліміздің 20 өңірінде психологиялық қолдау орталықтары ашылды. Бірнеше айдың ішінде орталықтарда 240 мыңға жуық азаматқа көмек көрсетілді.
Қауіпсіз және қолдаушы білім беру ортасын құруға «Қазақстанның медиативті мектептері» жобасы жүзеге асырылуда. Бастама аясында еліміздің барлық мектептерінде мектеп медиациясы қызметі жұмыс істей бастайды. Олардың құрамына жоғары сынып оқушылары, педагогтар, психологтар, әлеуметтік педагогтар, ата-аналар, сондай-ақ үкіметтік емес ұйымдардың, қамқоршылық кеңестердің және аға буынның өкілдері кіреді.
