«Білімді мыңды жығады». Бұл сөздің растығын ой жарысынан озып шыққан Ұйғыр ауданының оқушылары дәлелдеді. Олар Астана қаласында өткен ауыл мектептері оқушыларына арналған олимпиадада топ жарып, жерлестерін қуанышқа бөледі.
Аталған олимпиада биыл екінші рет өтіп отыр. Қазақстан Республикасы Оқу-ағарту министрлігі қолға алған білім сайысы қала мен ауыл мектептері арасындағы алшақтықты азайтуға бағытталған. Сонымен қатар еліміздің шалғай елдімекеніндегі дарынды балаларды анықтап, жас таланттардың халықаралық олимпиадаға қатысуына жол ашу.
Төрт кезеңнен тұрған олимпиаданың құқықтық-гуманитарлық бағыты бойынша бақ сынаған оқушылардың бірқатары үздік нәтиже көрсетті. Атап айтсақ, Шонжыдағы №1 мектеп-лицейінің 11-сынып оқушысы Малинур Сәметова құқық негіздері пәні бойынша, 10-сыныпта оқитын Нурсанам Хитахунова Қазақстан тарихы пәнінен және Долайты орта мектебінің 10-сынып оқушысы Шахризат Ибадуллаева қазақ тілі пәні бойынша І дәрежелі диплом иегерлері атанса, Илья Молутов атындағы №3 орта мектебінің 10-сынып оқушысы Фатима Перлиманова орыс мектептеріне арналған қазақ тілі пәнінен өткен жарыста ІІІ орынға қол жеткізді. Жеңімпаздарды аудан азаматтары ықыласпен қарсы алды. Салтанатты шара И.Молутов атындағы №3 орта мектепте өтті.
Әдемі безендірілген мектеп алаңына білім беру мекемелерінің басшылары, қоғам белсенділері, аудан ақсақалдары, ұстаздар қауымы жиналды. Оқушыларды ақ жаулықты аналар шашумен қарсы алды.
Алғашқы болып сөз алған Ұйғыр аудандық мәслихат төрағасы Нұрәкім Есжан жеңімпаздарды құттықтап, алар асуының биік, бағындырар белесінің көп болуын тіледі. Олардың осындай деңгейге жетуіне мол үлес қосқан ұстаздар қауымына алғыс білдірді. Мұнан соң жүлдегерлердің әрқайсысына 100 мың теңгеден сыйақы табысталды.
Аудандық білім бөлімінің басшысы Мөлдір Құрманалиева да шәкірттеріне ризашылығын білдірді. Олардың жеңіс тұғырынан көрінуі аудан, облысымыз үшін зор мәртебе, мақтаныш екенін жеткізді. Оқушыларды олимпиадаға дайындаған Бахтихан Оталипова, Халидам Хевизова, Аида Максимова, Сандуғаш Бірімқұлова сынды ұлағатты ұстаздар марапатталды. Сондай-ақ балаларының әр қадамына мән беріп, білімге деген құштарлығын арттырған ата-аналарға да сый-сияпат көрсетілді.
Ұйғыр аудандық ардагерлер кеңесінің төрағасы Ербол Нұрсейітов, ауыл ақсақалы Шамахун Нурумов, аудандық аналар кеңесінің төрағасы Гүлжахан Әликеевалар ақжарма тілектерін арнады. Үздіктар арасынан сөз алған Долайты орта мектебінің 10-сынып оқушысы Шахризат Ибадуллаева әр қадамына қолдау білдірген ата-анасы мен ұстаздарына алғыс айтты.
Жеңіс тек табандылық мен талап, еңбек пен білімнің арқасында келеді. Осыны аңғарған біздің шәкірттеріміз сонау арқа төсінде жүздеген оқушы қатысқан сайыста жүйрік атанып, аудан абыройын асқақтатты. Қуанышымыз еселене берсін!
Анар Дүйсенбайқызы
Ұйғыр ауданы
