Тәуелсіздік мерекесі Қарасай ауданы жұртшылығының мерейін асырған ерекше қуанышты жайтпен жалғасын тапты. Бұл күні аудан әкімдігінде халықтың әлеуметтік осал топтарына баспана кілті табыс етілді.
Салтанатты шарада Қарасай ауданы әкімінің орынбасары Рустам Атшабаров жаңа баспана иелеріне ыстық ықыласын арнады.
– Құрметті жаңа қоныс иелері және жиналған қауым! Бүгін ерекше маңызды әрі қуанышты сәттің куәсі болып отырмыз. Қарасай ауданы бойынша тұрғын үйге мұқтаж ретінде тіркелген азаматтардың саны 8000-нан асады. Олардың 3 мыңға жуығы – әлеуметтік жағынан осал топ өкілдері. Аталған санаттағы отбасыларды қолдау мақсатындағы жұмыстар жалғасын тауып келеді. Соның бір дәлелі – бүгін бірқатар отбасының баспаналы болуы. Жаңа қоныстарыңызға шаттық пен береке тілеймін! Әр шаңырақта бейбітшілік пен молшылық болсын!
Жыл басынан бері ауданда 48 отбасы жаңа баспанаға қол жеткізіп, өз шаңырағын көтерсе, осы күні тағы 16 отбасының көптен күткен арманы орындалды. Бұл – мемлекет тарапынан көрсетіліп жатқан қамқорлықтың, әлеуметтік қолдаудың жарқын үлгісі десе жарасады. Қарасай ауданының тұрғындары үшін мұндай маңызды оқиғалар болашаққа сеніммен қарауға мүмкіндік береді. Айтулы мерекеде осындай игі істің жүзеге асуы ел бірлігі мызғымайтынын тағы бір мәрте дәлелдей түсті.
Пәтер кілтін алушы Айнұр Смағұлова: «Мен 10 жыл бойы тұрғын үй кезегінде тұрдым. Бұл кезек өтпейтіндей көрінген еді. Енді, міне, биыл сәті түсіп, пәтер кілтін алып отырмын. Қуанышты сәтте алдымен мемлекетімізге, одан кейін аудан әкімі мен бізге көмек қолын ұсынған азаматтарға алғысымды білдіремін. Тәуелсіздік мерекесі қарсаңында осындай қуанышқа кенеліп отырғаныма шексіз бақыттымын. Менің 5 балам бар, енді отбасымызбен өз үйімізде жайлы өмір сүретін боламыз», – деп ризашылығын білдірді.
Қуат ҚАЙРАНБАЕВ
Қарасай ауданы
