Еліміздің басты мерекесі – Тәуелсіздік күніне орай Алматы облысында барлығы 30-дан астам іс-шара өткізілді. Жоспарға сәйкес қолға алынған игі шараға 5000-нан астам адам қатысып, отаншылдық рух пен елді, жерді сүюдің мән-маңызын арттыра түсті.
Ақжолтай жаңалықтардың ішінде Райымбек ауданы Нарынқол ауылында Жастар ресурстық орталығының бой көтеруін ерекшелеп айтуға болады. Бұдан бөлек, Сарыбастау ауылында спорт кешені ашылып, өңір тұрғындарын қуанышқа бөледі. Дәл осындай игі іс Кеген ауданында да көрініс тапты. Бөлексаз ауылының тұрғындары енді өнер шараларын жаңа Мәдениет үйінде тамашалайды.
Тәуелсіздікке тарту мұнымен түгесілмейді. Жамбыл ауданы Үлгілі ауылында жаңа Мәдениет үйі жұмысын бастады. Ал Ақтерек ауылы көгілдір отынға қосылып, бес отбасыға пәтер кілті тапсырылды. Бұл өңірде тұрғындарды қуантқан тағы бір жаңалық – Жамбыл ауылында көшелерге электр жарығының қосылуы болды.
Мерекеге орай Балқаш ауданында көптеген отбасыға баспана кілті берілді. Жуық арада Талғар ауданының тұрғындарына да пәтер кілттерін табыстау жоспарланып отыр. Сондай-ақ, аудан-қалаларда дөңгелек үстелдер, патриоттық акциялар мен спорт жарыстары ұйымдастырылды.
Сонымен қатар, 15 және 16 желтоқсан күндері облыс аумағында көпбалалы отбасылар, қарттар, аз қамтылғандар мен мүгедектігі бар азаматтарға арналған 20-дан астам қайырымдылық акциясы, «Менің Елім – Менің Туым» тақырыбында акциялар, қоғамдық пікір көшбасшыларының, этнос өкілдерінің, депутаттар мен жастардың бейне құттықтаулары ұйымдастырылып, әлеуметтік желілер арқылы таратылды.
