Халықаралық еріктілер күніне орай, көпшілікке көмек қолын созып, игі іс жасап жүрген жандардың мерекесі аясында Астана төрінде Қазақстанның үздік волонтерлері марапатталды.
Биыл «Жыл волонтері» атты халықаралық сыйлыққа 15 бағыт бойынша 118 өтінім түскен. Қатысушылар түрлі жобалар мен бастамалар дайындаған. Нәтижесінде үздік деп танылған 47 үміткер іріктеліп, сыйлық иегері атанды. Сондай-ақ шарада «Игі істер марафоны» жобасының 5 номинациясы бойынша жеңімпаздар марапатталды. Олардың арасында Талғар ауданынан Меруерт Юсупова «Білімді әйгілеудегі үлесі үшін», Индира Қасымбаева «Салауатты өмір салтын насихаттауға белсенді қатысқаны үшін» номинациясында, Балқаш ауданынан Ғазиза Әдіғали «Игі істер марафоны» жобасы аясында жыл үздіктерінің қатарынан көрінді.
– 2022 жылы қазан айынан бастап Талғар ауданындағы жастар ресурстық орталығының психолог-маманы болып қызмет етіп келемін. Осы уақытқа дейін түрлі акциялар, тренингтер, кездесулер өткіздік. Соның ішінде нашақорлыққа қарсы күрес, репродуктивті денсаулық, зорлық-зомбылық бойынша қарқынды жұмыс істедік. Еңбегіміз еленіп, «Жыл волонтері» сыйлығына ие болдық. Алған әсерім өте керемет, бұл менің ғана жеңісім емес, жастар ресурстық орталығының жетістігі, – дейді халықаралық сыйлықтың иегері Индира Қасымбаева.
Биыл еліміздегі волонтерлар көктемгі тасқын мен V Дүниежүзілік көшпенділер ойындарында ерен еңбек сіңірді. Айта кетейік, 2020 жылы Мемлекет басшысы Қасым-Жомарт Тоқаевтың бастамасы бойынша «Жыл волонтері» халықаралық сыйлығы тағайындалған болатын. Бұл марапат өз жалғасын тауып келеді.
Ерзат АСЫЛ
