Соңғы жылдары ұлттық құндылықтарымызды дәріптеуге ерекше көңіл бөлінуде. Соның бір дәлелі – Шалқар орта мектебі мен О.Жандосов ауылдық ақсақалдар және әжелер ұйымдарының қолға алуымен өткен «Бағалай білгенге бақ қонады, қуана білгенге құт қонады» тақырыбындағы іс-шара.
Аталмыш шарада ұмыт болып бара жатқан салт-дәстүріміз, әдет-ғұрпымыз кеңінен паш етіліп, мектептің екінші қабаттағы фойесінде орын тепкен «Аталар», «Әжелер», «Аналар», «Әкелер», «Келіндер» ауылдарында айшықты көріністер көрсетілді. Сол сияқты ұлттық құндылықтарды паш ететін көрме де көрген жанды бейжай қалдырмады. Мұндағы қолөнер шеберлерінің айқын қолтаңбасы еріксіз таңдай қақтырды. Ал сахнадағы қойылымдар тартымдылығымен өзгеше өрнек тапты. Қастерлі бабамыз Бейбарыс батырдың нар тұлғасын сомдау мен ұрпағына қалдырған өсиет сөзін жеткізу сондай әсерлі шықты.
Әжелер тобын көрермен қауым зор қошеметпен қарсы алды. Олар «Әжелер сәлемі» әнін айтып, ұмытылуға айналған «Танабау тағу» дәстүрінен көрініс көрсетті. «Самғау» шығармашылық орталығының бишілері қазақ биін тарту етсе, «Батыс кимешектер» жобасының жетекшісі Аршагүл Серікова ұлттық киім үлгілерімен таныстырды. Жергілікті сазгер әрі әнші Советай ханым «Жақсы адамдар», «Анамның туған күндері» әндерін келістіре орындап, үлкен құрметке бөленді. Ұлттық ойын өрнектерін көрсетіп, патриоттық бағытта ән шырқаған оқушыларға да көпшілік риза болды.
Жиналған жұртшылық аталмыш шараның өтуіне атсалысқан мектеп мұғалімдері мен оқушыларға, ауылдық ардагерлер ұйымының төрағасы Молдағали Бейісбаев пен әжелер ұйымының төрайымы Елена Шынжырбайқызына алғыстарын білдірді. Тағылымды шараның жас ұрпаққа берер тәлімі зор болды.
Қанат ТӘКЕБАЕВ
Қарасай ауданы
