Бұқаралық ақпарат құралдарынан елімізде терроризмді насихаттады деген жаңалықтарды көп байқауға болады. Дінді құрал ретінде пайдаланып бейбіт елде үрей мен дүрбелең тудыруға, кісі өлтіруге, мемлекетті басып алу мақсатында лаңкестік әрекетке шақыратын уағызшылар саны көбейген. Қазақстанда экстремизм мен терроризмге қарсы күреске айрықша көңіл бөледі.
Әлеуметтік желілерде осындай терроризм идеясына, лаңкесттік әрекетке шақыратын материалдарды немесе тура сондай діни әдебиеттерді таратып не сақтаған адам ҚР қылмыстық кодексінің 256 бабына сәйкес жауапқа тартылады.
ҚР Қылмыстық Кодексiнің 256-бабы бойынша, «Терроризмдi насихаттау немесе терроризм актiсiн жасауға жария түрде шақыру:
- Терроризмдi насихаттау немесе терроризм актiсiн жасауға жария түрде шақыру, сол сияқты көрсетілген мазмұндағы материалдарды тарату мақсатында дайындау, сақтау немесе тарату –
мүлкі тәркіленіп, 5 жылдан 9 жылға дейiнгi мерзiмге бас бостандығынан айыруға жазаланады.
- Адам өзiнiң қызмет бабын пайдалана отырып не қоғамдық бiрлестiк лидері жасаған не бұқаралық ақпарат құралдары немесе телекоммуникациялар желілері пайдаланыла отырып жасалған не адамдар тобы немесе алдын ала сөз байласу арқылы адамдар тобы жасаған, оның ішінде шетелдік көздерден алынған қаражат пайдаланыла отырып жасалған дәл сол іс-әрекеттер – мүлкі тәркіленіп, 7 жылдан 12 жылға дейiнгi мерзiмге бас бостандығынан айыруға жазаланады.
Көбіне азаматтарымыз әлеуметтік желілерде осындай материалдарды таратқаны үшін сотты болып жатады. Лаңкестік әрекеттерге шақыратын аудио, бейне, мәтіндік материалдарды ғаламтор ресурстарында жариялаудың, экстремистік мазмұндағы ақпараттарды әлеуметтік желілерде таратудың жауапкершіліктері жайлы халық біле бермейді. Діни ақпаратты интернеттен аларда өте мұқият болған дұрыс. Ондай ақпаратты елімізде ресми тіркелген діни біллестіктердің арнайы сайттарынан, парақшаларынан алған ләзім. Қолыңызға қандай да бір діни кітап түсе қалған жағдайда, ол кітаптың дұрыс/бұрыстығына күмәндансаңыз, міндетті түрде Дін істері комитетінің дінтану сараптамасының оң қорытындысы берілгеніне көз жеткізіңіз. (Көбіне бірінші бетінде жазылады)
Терроризм мен экстремизм – адамзаттың қас жауы! Оны елге кіргізетін болсақ жазықсыз жандар – балалар, аналар зардап шегеді.
Терроризмге қарсы іс-қимыл және алдын-алу мемлекеттік саясаттың басым бағыттарының бірі болып табылады. Терроризммен немесе басқа да мәселелермен күрес бір ғана адам немесе топ қана айналысатын дүние емес, қоғам болып ат салысатын күрделі мәселе.
Тұрсынғали Әліп,
дінтанушы
