Вирустық маусым кезінде өңірде жыл сайын 500 мыңнан астам адам медициналық көмекке жүгінеді. Бұл туралы Алматы облысының Бас мемлекеттік санитариялық дәрігері Марат Исмаилов баспасөз мәслихатында баяндады.
Халықтың шамамен 5-15%-ы тұмауға шалдығады.Биылғы маусымда 149 мыңнан астам науқас тіркелген, олардың басым бөлігі – балалар. Дегенмен,алдыңғы жылмен салыстырғанда сырқаттанушылық 36%-ға төмендеген.
Тұмау вирусының түрлері мен таралу жолдары ерекше назар аударуды талап етеді. ЖРВИ зерттеулерінде А/H1N1 вирусы, парагрипп, аденовирус, риновирус және коронавирус түрлері анықталған. Сонымен қатар, Қытайда таралып жатқан метапневмовирусқа ерекше мән берілуде.
Марат Исмаиловтың айтуынша, тұмаудың ең қауіпті асқынулары тыныс алу жолдарында дамиды. Ларингит, бронхит, пневмония сияқты аурулар адам өміріне қауіп төндіруі мүмкін. Жүкті әйелдер мен қарт адамдар үшін тұмаудың салдары аса ауыр болуы ықтимал.
Аурудан қорғану үшін қарапайым, бірақ тиімді шараларды сақтау маңызды. Мамандар екпе алуды ең сенімді әдіс ретінде ұсынады. Сонымен қатар, бетперде тағу, қолды жиі жуу және адам көп жиналатын жерлерден аулақ болу да вирустардың таралуын шектейді.
«Тұмауды емдегеннен гөрі, оның алдын алған жеңіл. Әр адам өз денсаулығына жауапкершілікпен қарап, қарапайым ережелерді сақтаса, вирустардың таралуын азайтуға болады»,-дейді Марат Исмаилов.
