Облыс әкімі Марат Сұлтанғазиев Кеген ауданына жұмыс сапарымен келді. Ең алдымен аймақ басшысы мемлекет және қоғам қайраткері Заманбек Нұрқаділовтің ескерткіш-бюстіне тағзым етті.
Бұдан соң, жаңадан қолданысқа берілген Заманбек Нұрқаділов атындағы Кеген ауылындағы балалар өнер мектебінің ішін аралап, ұстаздармен кездесті. Өнер мектебінің оқушылары домбыра тартып, ән айтып, өнерлерін ортаға салды.
Мектеп директоры Гүлназ Жұмашова:
– Кеген ауылындағы балалар өнер мектебі 2015 жылы ашылды. 3 бағыт, 9 мамандық бойынша білім береді. Домбыра, баян, қобыз, дәстүрлі ән, эстрада-вокал, фортепиано, хореография, бейнелеу және мүсін, сәндік қолданбалы өнер және әртүрлі үйірме бағыты бойынша жұмыс істейді. 47 жоғары білімді мұғалім қызмет атқарады. Жылдан жылға ата-аналардың сұранысы артып, бала саны 756 оқушыға жетті, – деп оқу ошағы жайлы баяндады.
Сапар барысында Марат Елеусізұлы Кеген ауданының полиция бөліміне арнайы ат басын бұрды. Жуырда тағайындалған Кеген ауданы полиция бөлімінің бастығы Әсет Ерікұлы мұндағы ғимараттың 1979 жылы салынғанын, бүгінде тозығы жетіп тұрғандықтан күрделі жөндеуді талап ететінін жеткізді. Бұған орай облыс әкімі ғимараттың жай-күйі жіті зерттелген соң, сұранысқа нақты жауап берілетінін айтты.
Жұмыс сапары соңында аймақ басшысы Кеген ауданының даму мүмкіндігі мол, әлеуеті зор екенін атап өтті.
Дәурен ӘБУТӘЛІПОВ,
Кеген ауданы
