Қалың қар жауғалы Жамбыл ауданында автокөлік жолдарын тазалау ісінде тыным жоқ. Қар күрейтін арнайы техникалар күндіз-түні жұмыс істеп, жолаушылардың діттеген жеріне кедергісіз жетуіне жағдай жасауда. Мұндағы аудандық, облыстық, республикалық маңызы бар жолдарға бірнеше ұйым бекітілген.
Аудандық маңызы бар автомобиль жолдарының ұзындығы – 915 шақырым. Оны қысқы күтіп-ұстау жұмысын «АБЗ КАРЬЕР ДРСУ» жауапкершілігі шектеулі серіктестігі жүргізеді. Елдімекендер арасын байланыстыратын жолдар қардан тазартылып, көктайғаққа қарсы материалдар себілді. Жұмысты уақытылы және сапалы жүргізу үшін 4 КДМ, 3 МТЗ тракторы, барлығы 7 бірлік арнайы жол техникасы жұмылдырылды.
Облыстық маңызы бар автомобиль жолдары – 393 шақырым. Осынша жолды қысқы күтіп ұстауды «Дортехмонтажсервис» ЖШС жүгізуде. Бұл жолдар да қардан аршылып, көктайғаққа қарсы материалдар себілді. Жұмысты уақытылы және сапалы орындау үшін аталған мердігер ұйымының 11 арнайы техникасы жолға шықты. Бұлар – 8 КДМ және 3 МТЗ тракторы.
Аудан аумағынан өтетін республикалық маңызы бар жолдар «Алматы-Бішкек», «Алматы-Шамалған-Ұзынағаш-Аққайнар-Сұраншы батыр-Қырғызстан шекарасы», «Ұзынағаш ауылына кіреберіс» деп аталады. Бұлардың жалпы ұзындығы – 187 шақырым. Осы автомобиль жолдарына қысқы күтіп-ұстау жұмыстарын АОФ «КАЖ сервис» ЖШС-не қарасты «ДЭУ-14» мердігер ұйымы жүргізуде. Мұнда 8 бірлік арнайы техника жұмылдырылды: 5 КДМ, 2 тиегіш, 1 автогрейдер. Аталған жолдар қардан тазартылып, көктайғаққа қарсы материал пайдаланылды. Сондай-ақ республикалық маңызға ие «Алматы-Астана» күрежолының 144 шақырымы аудан ішімен өтеді. Оны қысқы күтіп ұстауды да АОФ «КАЖ сервис» ЖШС-ге қарасты ДЭУ-20 мердігер ұйымы міндетіне алған. Мұнда 12 бірлік арнайы техника жұмыс істеді, атап айтқанда, 7 КДМ, 2 тиегіш, 1 автогрейдер, жүк көлігі мен трактор.
Қардан тазарту және көктайғаққа қарсы себу жұмыстары жалғасуда.
Серік САТЫБАЛДИЕВ
Жамбыл ауданы
