Тренд – белгілі бір іс-әрекетті немесе затты, ас түрін, стиль, мінез-құлықты күнделікті әдетке, танымалдылыққа айналдырып, соған адамдардың назарын аудару. Бастапқыда «Тренд» ұғымы «бағыт», «бағдар» дегенді білдіріп, экономика саласында қолданылған. Кейіннен блогерлер және инфлюенсерлердің бастауымен «тренд» сөзі кең ауқымды мағынаға ие болды. Соның бірі – Tik Tok, Instagram, YouTube сияқты әлеуметтік желілердегі тренд.
Жастар арасында трендтен қалмау өте маңызды болып барады. Менің ойымша, трендтен қалмау – «Жұрттың баласы не істесе, жесе, кисе, мен неге соны істей алмаймын?» деген ой жиынтығы немесе жай ғана қызықтан қалмау, танымал болудағы мүмкіндікті жіберіп алмау дегенді білдіреді. Мәселен, соңғы уақытта өзімізге таныс шоколадтағы құлпынай, одан соң Дубай шоколады, Қытайдың «Шайн мускат» жүзімі, «Bahroma» балмұздағы трендте болды. Ал дәл қазіргі таңда сублимацияланған (құрғатылған) жемістер трендте. «Елден қалмайық» деген оймен жасы да, кәрісі де, ақшасы басқа дүниесіне жетпей жатса да, Дубай шоколадын міндетті түрде алып, дәмін татып көреді. Себебі, не өзі, не бала-шағасы трендтен қалмауы тиіс. Бұл бағыттағы топты «трендқұмарлар» деп атауға болады. Олар қажетсіз заттарға қаржы салып, уақытын да сарп етуде. Өйткені, тренд қуу мұндай адамдар үшін дертке айналған.
Қоғамның екінші бөлігін тренд ойлап табушылар немесе трендтен табыс, пайда көретіндер деп бөле аламыз. Трендті ойлап табушылар қалай танымалдылыққа ие болса, солай қомақты қаражатқа да оңай қол жеткізеді. Мәселен, алысқа бармай-ақ, қазақстандық Алина Кимді алсақ, 2018 жылдан бері көрерменге қызықты әрі оңай би қимылдарын ойлап тауып, әртүрлі әлеуметтік желілерге жариялау арқылы танымалдылыққа да, күнделікті табыс көзіне де ие болды. Жоғарыда айтқан трендқұмарлардың арқасында түрлі блогер, тиктокерлердің үздіксіз пайда көріп жатқандары жасырын емес.
Жақында жастар арасында жаңа тренд шықты. Бұл тренд адамның жеке дамуына арналған, яғни таңғы сағат 5-6 шамасында тұрып, спортпен айналысу, күнде кітап оқу секілді пайдалы істі көздейді. Демек, трендті өзіміз қаласақ, пайдаға да, табысқа да айналдыра аламыз.
Тренд ұғымы осыдан 10 жыл бұрын пайда болып, біздің мәдениетіміз бен қоғамымызға терең еніп қойған, сондықтан біз оны сараптап, тек пайдалы жағын ғана қолдана білуіміз қажет. Сонда ұтылмасымыз анық.
Манура Нүсіпбай,
М.Ғабдуллин атындағы орта мектептің 11-сынып оқушысы
Абай ауылы,
Қарасай ауданы
