Биыл – Ұлы Жеңістің 80 жылдығы. Осыдан 80 жыл бұрын біздің аталарамыз қан майданда жауды ойсырата жеңіп, фашизмді талқандаған болатын. Биыл сол Ұлы Жеңістің 80 жылдығын қарсы алу алдында тұрмыз. Бұл біз үшін жай ғана той емес, тарихты таразыға салатын, батырларымыз бен қаһармандарымызды ұрпаққа өнеге ететін, өткенімізге баға беретін айтулы күн. Дәл осы туралы мемлекет басшысы Қасым-Жомарт Тоқаев та өзінің «Ана тілі» газетіне берген сұхбатында тоқталған екен.
Біздің аталарымыздың соғыста жанқиярлықпен соғысқанын, аналарымыз бен сол кездегі балалардың әскерді азық-түлікпен, киім-кешекпен қамтудағы ерен ерлігін айта келе, алдағы жылды өшпес ерлік көрсеткен батырларымыздың есімін жаңғыртуға басты назар аударатынымызды айтыпты. Сондай-ақ Б.Момышұлының – 115, М.Ғабдуллиннің – 110, Ә.Молдағұлованың 100 жылдығы салтанатты іс-шаралар тізіміне кіретінін жеткізген. Сұхбатында: «Жеңістің биылғы мерекесі Қазақстанның бірде-бір азаматын бей-жай қалдырмайтынына сенімдімін. Өйткені біздің елде сұрапыл соғыстың зардабын тартпаған отбасы жоқ деуге болады. Соғыста қаза тапқандарды ұмытпай, қаһарман ерлеріміздің рухына тағзым ету, ел ішінде бейбітшілік пен тыныштықты сақтау – баршаға ортақ парызымыз», – деген Мемлекет басшысы алдағы жылы көзі тірі ардагерлерімізге құрмет-қошемет көрсетіп, дүниеден өткен батырларымызды еске алатын жыл екенін айтады.
Иә, 80 жылдық Жеңістің мерейлі белесін атап өту баршамыздың міндетіміз. Сондықтан ауданымызда да бұл айтулы күн өз дәрежесінде аталып өтетіні айқын. Бұл жылы өшкенімізді жандырып, өлгенімізді қайта тірілтетін тағы бір тарихи жыл болмақ.
Ербол Нұрсейітов,
Ұйғыр аудандық ардагерлер кеңесінің төрағасы
