Алатау қаласының Жетіген ықшамауданында Итеміровтер отбасында үшем дүниеге келді. Ата-анасы сәбилеріне Айару, Айлин, Айкөркем деген есімдер берді.
Үшемдердің анасы Кәмила Айназарова мен әкесі Бағашар Итеміров бұған дейін үш қызға жарық дүние сыйлаған. Енді тағы үш қызды өмірге әкеліп, көпбалалы ата-аналар қатарына қосылып отыр. Анасы мен нәрестелердің жағдайы бірқалыпты. Жүктілік кезінде де дәрігердердің жіті бақылауында болды. Дүниеге келгенде сәбилердің салмағы небары 2 килограмды құрады. Бүгінде күн сайын салмақ қосып, тез жетілуде. Бұл турасында Іле аудандық перзентхананың меңгерушісі Гауһар Ақанқызы хабардар етіп, дәл осы перзентханада үшемнің туылғанына дәрігерлер ұжымы да қуанып отырғанын жеткізді.
Нәрестелердің анасы №11 орта мектепте мұғалім болса, әкесі «Жетіген» стансасындағы көлік-логистикалық орталығында еңбек етеді.
– Жұбайым екеуміз сәбилердің өмірге келуін қуана күттік. Үшемнің дүниеге келуі – біз үшін керемет сый. Нәрестелерді бағып-қағу қиындығынан қорықпаймыз. Өйткені, бұған дейін үш қыз өсірген азды-көпті тәжірибеміз бар. Балалардың әкесі маған үнемі қолғабыс етіп, жұмысынан ерте келеді. Іле ауданының перзентхана ұжымына үш қызымыздың да дені сау болып, аман-есен дүнеиеге келгені үшін шексіз ризашылығымызды білдіреміз. Мұнда өз ісінің шынайы мамандары еңбек етеді, – деді бақыттан балбұл жанған ана.
Бұл қуанышты жайтқа Алатау қаласының әкімдігі де үн қатты. Қала әкімінің орынбасары Гүлбану Несіпбаева, қалалық мәслихат төрағасы Роза Абилова, облыстық мәслихат депутаты, «AMANAT» партиясы фракциясының мүшесі Нұрлан Түймелиев үшемнің үйіне барып, Итеміровтер отбасының қал-ахуалымен танысты. Қазірше баспана беру жағдайы толық қарастырылмағанымен келешекте бой көтеретін тұрғын үйлерден алғашқы болып пәтер алатынына сендірді. Үшем отыратын арба сыйлап, сәбилерге керек-жарақтарын сыйға тартты.
Өз сөзінде Нұрлан Лесұлы: «Үшемнің дүниеге келуі біздің облыс үшін теңдесі жоқ жаңалық болды. Сіздердің отбастарыңызға зор денсаулық, амандық және үлкен бақыт тілеймін. Балаларыңыздың дені сау болып өсе берсін!» – деді.
Бағдат ШОЙБАС
Алатау қаласы
