Райымбек ауданы Текес ауылының перзенті Ардақ Үстеновті жалпақ жұртқа танытқан – кәсіпкерлігі ғана емес, әдебиетке, әсіресе Мұқағали Мақатаевтың поэзиясына деген қадір-құрметі. Ол ақиық ақынның туған күнін жоғары деңгейде атап өтуді өзіне азаматтық парыз санап келеді.
Жыл сайын Алматыдан Жаңа Текес орта мектебіне арнайы келіп, оқушылар арасында Мұқағали өлеңдерін оқудан жарыс өткізеді. Жүзден жүйрік шыққандарға сый-сияпат көрсетіп, стипендия тағайындайды. «Есіңе мені алғайсың!» атты жыр бәсекесі биыл да зор қуаныш, шалқар шабытпен басталды.
Алғашқы сөз тізгінін ұстаған мектеп директоры Айдос Дәленбаев шараның мақсат-міндеттері туралы жиналғандарды хабардар етті. Жарысқа 4-11-сынып арасындағы 25 оқушы қатысып, өздерінің өлең оқудағы деңгейін көпшілік назарына ұсынды. «Желтоқсан ақиқаты» республикалық қоғамдық бірлестігінің төрағасы Болат Құрымбаев, Серік Жиенбаев, Ербол Қыдырбаев, Алма Ахтанова сынды Желтоқсан қаһармандары байқауға қазылық жасады.
Жыр жарысы ақын өлеңдеріне құрылған шағын сахналық қойылыммен басталды. Үміткерлердің бәрі де жоғары дайындықпен келгендерін аңғартты. Байқау қорытындысы бойынша, 10-сынып оқушысы Арай Бақытжанқызы бас жүлдеге тігілген стипендияны жеңіп алды. Ақын өлеңдерін мүдірмей жатқа айтқан Заңғар Қырғызбай жүлделі бірінші орынды иеленді. Байқаудың ең жас қатысушысы, 4-сынып оқушылары Сезім Тілеу мен Айзере Айыпжан екінші орыннан көрінсе, Ақниет Асанқұл, Айсұлу Рахманәлі, Інжу Жақсылық үшінші орынды қанағат тұтты. Жеңімпаздардың бәрі жеткен жетістіктеріне қарай Ардақтай атымтай жомарт ағалары тағайындаған ақшалай сыйлықтарға ие болды.
Ақын өлеңдерін оқудан өткен байқауға Нұрболат Таубалдиев сынды іскер азамат та демеушілік танытып, 5 оқушыға ынталандыру сыйлығын ұсынды. Басқа қатысушыларға мектеп әкімшілігінің дипломдары мен Алғыс хаттар табысталды. Желтоқсаншылар ұлттық мүдеге жанашырлық танытып, жас жеткіншектерді қолдауда көпке үлгі болып, өнегесін шашып жүрген Ардақ Үстеновке алғыс айтып, «Желтоқсан ақиқаты» республикалық қоғамдық бірлестігі тағайындаған «Ұлт патриоты» медалімен марапаттады.
Сөз реті келгенде үміткерлерді Мақатаев оқуларына жоғары деңгейде дайындағаны және айтулы шараны ұйымдастырудағы ұтқырлығы үшін мектеп директорының оқу ісі жөніндегі орынбасары Өзгер Батырбековаға да ризашылық білдірген орынды. Осылайша Мұқағали Мақатаевтың туған күніне арналған «Есіңе мені алғайсың!» атты мектеп оқушыларының жыр сайысы ақын рухын тағы бір асқақтатты.
Жұмабек ТҰРДИЕВ
Райымбек ауданы
