Астанада Мемлекет басшысы Қасым-Жомарт ТОҚАЕВ отандық бизнес өкілдерімен кездесіп, Қазақстанның көшбасшылық рөлін сақтау және күшейту міндеті ұлттық идеяның маңызды бағытына айналуы керегін баса айтты. Басқосуда Президент қазіргі заманның басты мәселелерін шешу жолында Қазақстан жаңа көзқарас пен жаңа тәсілдер дәуіріне қадам басқанын, ал ескірген стереотиптер өткеннің еншісінде қалғанын атап өтті. Сондықтан еліміз түбегейлі өзгеріп, жаңа жағдайға бейімделуі керек. Бұл ретте шағын және орта бизнесті қолдау мәселесі ұдайы Үкімет назарында болуы тиіс.
Мемлекет басшысы алға қойылған міндеттерді шешу жолында билік пен ірі кәсіпорын иелерінің арасында нәтижелі байланыс орнату маңызды екенін алға тартты. Президенттің пікірінше, ел экономикасын көтеру үшін кәсіпкерлермен бірлесіп, ауқымды жобалар дайындау қажет. Инвестиция тарту басты қадамның бірі саналғанымен басқа да салаларға ден қойған абзал. Мәселен, туризм, жүк тасымалы, теміржол, әуе қатынасы сияқты әлемде үлкен сұранысқа ие салалар бізде әлі толық өз деңгейінде дами алмай отыр. Бұл орайда кәсіпкерлікке тосқауыл болатын көптеген құжаттар, тексерулер баршылық. Президент бұл мәселені де айналып өтпей, бірнеше нормативтік құжат ізгілендірілгенін, негізсіз тексерулер мен айыптаулар айтарлықтай қысқарғанын жеткізді. Бір сөзбен айтқанда, Үкімет кәсіпкерлікті қолдауға бар жағдайды жасап отыр.
Ел басшысы соңғы уақытта көпшілікті алаңдатқан үлкен мәселе – қосымша құн салығына да кеңінен тоқталды. Үкіметке қосымша құн салығы мәселесін тағы да пысықтауды тапсырып: «Кез келген реформаны жан-жақты сараптап, байыппен жүргізген жөн. Экономика салаларының ерекшеліктерін ескере отырып, түрлі нұсқаларды әзірлеу керек. Қосымша құн салығына қатысты бұған дейін көзқарасымды білдірмеген едім. Өйткені қызметтік дәрежеме сәйкес, менің әрбір сөзім, пікірім қатаң тапсырма сияқты қабылданады. Соған қарамастан бұл мәселе бойынша ойымды жеткізгім келеді. Қалай десек те, қосымша құн салығының мөлшерлемесі сараланып белгіленуге тиіс. Үкімет түпкілікті шешімді білікті сарапшылардың, қайталап айтамын, білікті сарапшылар мен кәсіпкерлердің, әлбетте депутаттардың пікіріне құлақ аса отырып, нақты есептеулер негізінде қабылдағаны дұрыс. Бір анығы, Үкіметтің қазіргі ұсынып отырған мөлшерлемесі тым жоғары. Сіздер нақты цифрды айттыңыздар. Оны қоғам қызу талқылады. Тіпті, кей жағдайда артық сөздер де айтылды. Дегенмен бұл қоғам талқысына алдын ала салынған ұсыныс болатын. Тағы қайталап айтамын, Үкіметтің бұл бағыттағы жұмысы бизнес, қоғам, кәсіпкерлер, сарапшылардың, яғни барлық тараптың пікірі ескеріле отырып жалғасуы керек. Биыл нақты шешім қабылдануға тиіс. Мен бұған дейін де айттым. Үкімет бұл мәселені депутаттармен және сарапшылармен егжей-тегжейлі талқылауы керек. Айтылған ой-пікірлер ескеріледі. Мемлекетке барынша оңтайлы шешім қажет. Яғни, бір жағынан, бизнес жүргізуге кедергі келтірмей, қолайлы жағдай жасайтын, ал екінші жағынан, салыққа қатысты тәртіпті күшейтіп, бюджет кірісін арттыратын тиімді жолды табуымыз қажет», – деді.
Мемлекет басшысы еліміздің қаржылық жағдайы, кейбір дақпырттарда айтылғандай, мүшкіл емес екенін, бірақ босаңсуға болмайтынын, экономикада 4,8 пайыздық өсім барын, десек те, дамудың жаңа даңғылын іздеу керегін әңгімеледі. Қасым-Жомарт Тоқаевтың пікірінше, тек бюджет қаржысымен экономиканы жаңғырту мүмкін емес. Аталған үдеріске банктердің бәрі атсалысқаны маңызды. Жиында Ұлттық қор, бизнесті қолдау, банктердің жұмысы жайлы сөз болды. Сонымен бірге, несие алатын жекелеген азаматтардың жай-күйі де негізгі тақырыпқа айналды. «Реттеушілік шаралардың қатаңдағанына қарамастан, тұтынушылық несие көлемі бұрынғыдай өсіп келеді. Былтыр аталған көрсеткіш 33 пайызға ұлғайды. Ал проблемалық борышкерлердің саны 1,5 миллион адамнан асты. Қарызға белшесінен батқан азаматтарға көмектесу керек. Бұл – аса өзекті саяси мәселе. Сонымен қатар қаржылық сауатты арттыру, әсіресе өскелең ұрпақтың осы бағыттағы білімін жетілдіру маңызды. Осы ретте банктер проблемалық займдарды қайта қаржыландыру жұмыстарын күшейтіп, борышкерлердің санын өсіруге жол бермегені жөн», – деді Президент.
Мемлекет басшысы сөз қорытындысында былтыр көктемде болған су тасқыны кезінде қаржылай қолдау көрсеткен барша кәсіпкерлерге алғыс айтты. «Сөз соңында қайталап айтқым келеді: мемлекет еліміздің өндірісіне қаржы салатын, тұрақты жұмыс орындарын ашатын адал кәсіпкерлерді әрдайым қолдайды», – деді Қасым-Жомарт Кемелұлы.
Жиын соңында Үкімет мүшелері, кәсіпорын басшылары сөз сөйлеп, пікір білдірді.
Қуаныш ТҰНҒАТАР
