«ХХІ ғасыр көшбасшысы» зияткерлік сайысының өңірлік кезеңі мәресіне жетіп, облыстағы үздік бес оқушы республикаға жолдама алды. Жастардың білім көкжиегін кеңейтіп, логикалық ойлау, талдау мен жүйелеу машықтарын жетілдіріп, шешім қабылдау қабілеті мен шапшаңдығын да сынға салатын білім бәйгесі «Хабар» агенттігі мен ҚР Оқу-ағарту министрлігінің қолдауымен қайта жанданды.
Мектепішілік, аудандық кезеңдерде іріктеліп, Алматы облысының 43 мектебінен жиналған 68 оқушы Еңбекшіқазақ ауданы Ә.Бөкейханов атындағы орта мектеп базасында бақ сынады. Аудандық және қалалық кезеңдерде 30 сұраққа 45 минут берілсе, облыстық сында 60 сұраққа 75 минутта жауап беру керек.
Қарасай ауданы «KursantBilim Group» мектебінен Нұрәлі Алдаберген мен Шалқар орта мектебінен Аяна Зауыт, Талғар ауданы №13 орта мектептен Әділет Ержанұлы, Ш.Смағұлов атындағы мамандандырылған физика-математика лицей-интернатынан Толғанай Мүсірхан және Еңбекшіқазақ ауданы Әлихан Бөкейхан атындағы қазақ орта мектебінің 11-сынып оқушысы Мейрамбек Исамұханбетов қатарластарынан оқ бойы озық шығып, білім сайысының республикалық кезеңіне жолдама алды.
«Бұл сайысқа қатысу мақсатым – жаңа білім алу, көшбасшы ретінде өзімді сынап көру, басқа жастармен тәжірибе алмасу. Сайыс сұрақтары әр саланы қамтыған, жан-жақтылықты талап етеді», – деген Мейрамбек болашақта инженер мамандығын игеріп, қарыштап дамып жатқан құрылыс саласына өз үлесін қосуды армандайды.
Республикадан үздік шыққан үш жеңімпаз еліміздің жоғары оқу орындарында оқу гранттарын жеңіп алу мүмкіндігіне ие. «ХХІ ғасыр көшбасшысы» зияткерлік сайысы – еліміздің түкпір-түкпіріндегі озық ойлы жастардың басын қосып, білімін сынайтын үздік білім додасы. Аталған жарыстың араға жылдар салып, ортамызға қайта оралуы – мемлекет тарапынан білім саласына деген айрықша көзқарастың бір белгісі», – дейді облыстық білім басқармасы «Жас дарын» облыстық дарынды балалар мен талантты жастарды анықтау және қолдау ғылыми-практикалық орталығының директоры Ардақ Әсілбаева.
«ХХІ ғасыр көшбасшысы» зияткерлік сайысының республикалық кезеңі 2025 жылдың наурыз-сәуір айларында Алматы қаласында өтеді деп жоспарланып отыр.
Құралай МҰРАТҚЫЗЫ
Еңбекшіқазақ ауданы
