Астана төрінде өткен «Жаңа адамдар» жастар форумы Қазақстанның азаматтық қоғамы үшін маңызды алаңға айналды. Ел Президенті Қасым-Жомарт Тоқаев алғаш рет белсенді жастармен ресми емес, еркін форматта кездесті. Мұнда қатаң хаттама да, ресми баяндамалар да болған жоқ, тек ашық пікірталас, батыл идеялар мен шынайы бастамалар көтерілді.
Мемлекет басшысы жастар фору-
мында еліміздің келешегі ойы ұшқыр, білімі терең, көзқарасы заманауи жастардың қолында екенін айрықша атап өтіп, олардың әр бастамасын қолдайтынын жеткізді. Осы орайда Президент қазақ үйренетін де, үйрететін де ұлт болуы керек екенін, жастар бойындағы ерік-жігерді елдің өркендеуіне жұмсау қажет екенін сөз етті.
– Біз жұрттан көшілгері жүретін ел боламыз. Үйренетін де, үйрететін де ұлт боламыз. Жастар барлық өзгерістің бастауында тұрады. «Жаңа адамдар» – жаңа қоғамның айнасы. «Жаңа адамдар» – жаңа болмыс! Бұл – өз еліне адал жастардың қозғалысы! Біздің стратегиямызға қолдау білдірген сіздерге алғыс айтамын. Реформаларымыздың мән-маңызы ұрандарыңызда көрініс тапқан. Бұл өзгерістер Әділетті Қазақстанды құру, «Заң мен тәртіпті» қамтамасыз ету – тұжырымдамасына негізделген, – деп атап көрсетті Мемлекет басшысы.
Қасым-Жомарт Тоқаев жастарға қарата айтқан сөзінде отаншылдық сезімге, қоғамда «Заң мен тәртіп» үстемдігін орнатудың маңызына, «Таза Қазақстан» экологиялық акциясының идеологиялық мәніне тоқталды. Мемлекет басшысының пікірінше, ел үшін адал қызмет ету – жауапкершілік алудан қорықпайтын, батыл азаматтардың қолынан келетін іс.
– Жастарға барлық мүмкіндік жасалып жатыр. Қазақстан – балалар мен жастарға жан-жақты қолдау көрсететін әлемдегі аз елдің бірі. Дүниеге келген әр сәби бірден ұлттық бағдарламалардың қатысушысына айналады. Өздеріңізге мәлім, екінші жыл қатарынан Ұлттық қор табысының бір бөлігі балалардың есепшотына түсіп жатыр. Кәмелет жасына толғанда олар жинақталған қаржыны оқуға немесе баспана алуға жұмсай алады. Бес жастан асқан балаларға арналған «Келешек» бағдарламасы іске қосылды. Бұл жүйе ата-аналар үшін өте қолайлы. Сол арқылы балаларының болашақта алаңсыз білім алуына қаражат жинайды. Әр бала алты-жеті жастан бастап мектепте тегін білім алады. Мұның бәрі – мемлекеттің міндеті. Бірақ әлемнің барлық елінде дәл осылай емес. Барды бағалау маңызды. Біздің жетістіктеріміз баршылық. Елімізде бастауыш сынып оқушыларына тегін тамақ берілетін болды. Оқушыларымыз мемлекет есебінен әртүрлі үйірмелер мен секцияларға қатыса алады. Мектеп түлектерінің жоғары оқу орнына немесе колледжге грантқа түсу мүмкіндігі зор. Соңғы жылдары грант санын айтарлықтай ұлғайттық.
«Болашақ» бағдарламасымен мыңдаған жас шетелде білім алуда. Олар Қазақстанға келген соң ел дамуына үлес қосады.
«Президенттік жастар кадр резерві» сұранысқа ие жобаға айналды. Келешекте мемлекетті басқарушылардың негізгі легі осы жас мамандардан қалыптасады. Саяси реформалар аясында Мәжіліс пен мәслихаттарда жастар үшін арнайы квота енгізілді. Бұл өкілдік билік қызметіне тың серпін берді. Осы жерге жиналған білімпаз, отаншыл жастар мәслихаттың немесе Парламенттің құрамына кіретініне, тіпті Үкіметте жұмыс істейтініне кәміл сенемін. Жас кәсіпкерлер мен отбасыларды қолдауға айрықша мән беріледі. Мысалы, бизнесті дамытуға және баспана алуға жеңілдікпен несие беру қарастырылған. Бұл балалар мен жастардың өмірден өз орнын табуына жағдай жасауға бағытталған бағдарламалар мен жобалардың бір парасы ғана, – деді Президент.
Мемлекет басшысының сөзінше, елімізде түрлі салада жемісті еңбек етіп жүрген, заман талабына сай білікті мамандар өте көп. Сол үшін Қазақстан экономикасының жеделдете дамуына, азаматтардың әл-ауқатының өсуіне шешуші үлесті тек адам капиталы қоса алады. Ал жастар сол адам капиталының негізгі күші саналады. Мемлекет басшысының сөзінше, дарынды азаматтардың арқасында бүкіл әлем жұртшылығы Қазақстанды талантты әрі еңбекқор адамдардың елі деп тануда. Бұл ретте мемлекет креативті индустрияның дамуына барынша ықпал етпек. Қазір арнайы қор құрылуда, ол әдебиет, музыка, кино, сериал және компьютер ойындарына қатысты жобаларды жүйелі түрде қолдайтын болады. Жастардың қарым-қабілетін көрсетуіне бұл керемет мүмкіндік. Осы ретте Президент:
– Ең бастысы, адал еңбек етіп, адал табыс табу, яғни, адал азамат болу. Биыл – Жұмысшы мамандықтары жылы. Біз қоғамда еңбек адамының абырой-беделін көтеріп жатырмыз. Еңбек культін қалыптастыру – аса маңызды міндет. Кез келген жұмыс – қадірлі. Әсіресе, жұмысшы мамандықтарын игерген жастарымыз зор құрметке лайық, – деп атап өтті.
Қасым-Жомарт Кемелұлы сөзін қорытындылай келе, Қазақстанды көркейту қастерлі парыз екенін атап өтті. Берекелі бірлік пен жастардың жасампаздық қуатының арқасында Әділетті Қазақстанды бірге құратынымызға сенім білдірді. Қазақстанның жастары – жасампаз, тың идеялар мен игі бастамалардың бар екенін айтқан Президент форум атмосферасын сезіне отырып, қатысушылардың сөздерін тыңдап, кеудесін мақтаныш кернегенін де жасырмады. Қазақстанның болашағына деген сенімі нығая түскенін де қуана жеткізді.
– «Жас келсе – іске» деп бекер айтпаған. Еліміздің келешегі – ойы ұшқыр, білімі терең, көзқарасы заманауи жастардың қолында. Мен Президент ретінде Сіздерге зор үмітпен қараймын, – деді Қасым-Жомарт Кемелұлы.
Форумда «Жаңа адамдар» жастар қозғалысының Алматы кампусының жетекшісі Владимир Изюмников, қозғалыстың баспасөз хатшысы Алпамыс Әбілов, «Тұмар» азаматтық науқанының жетекшісі Ғалия Тузен, «Халық қаһары» азаматтық науқанының жетекшісі Әлихан Сәрсенов, «Antitrash» азаматтық науқанының жетекшісі Бауыржан Аманов сөз сөйлеп, Президент Қасым-Жомарт Тоқаевтың бастамасымен жүзеге асырылып жатқан реформаларға қолдау білдірді.
Ерзат АСЫЛ
