Жылдам дайындалатын кеспе өндіруде көшбасшы саналатын «Маревен Фуд Тянь-Шань» сауда-өндірістік компаниясы Алатау қаласының дәрігерлеріне В класты «Жедел жәрдем» көлігін сыйға тартты. Автомобиль алғашқы реанимациялық іс-қимыл мен дәрігерлік көмек көрсетуге, науқастарды емдеу мекемесіне жайлы тасымалдауға қажетті барлық заттармен жабдықталған.
Автомобиль кілтін табыстау шарасы Ынтымақ ауылындағы дәрігерлік амбулатория аумағында өтті. Оған «Маревен Фуд Тянь-Шань» фабрикасының директоры Сырым Құрманов және Алатау қаласы әкімдігінің өкілдері қатысты.
Шара барысында сөз алған фабрика директоры Сырым Құрманов «Маревен Фуд Тянь-Шань» компаниясы орналасқан аумақ Алатау қаласына қарайтынын атап өтті. «Біздің компанияда 660-тан астам қызметкер жұмыс істейді, олардың 95 пайызы – жақын маңдағы Арна, Заречный, Жетіген ықшамауданының тұрғындары. Сол себепті де жаңадан құрылған Алатау қаласы жұртшылығының пайдасына жарайтын, игілігіне қызмет ететін істі қолға алсақ деген шешімге келдік. Бүгінде компания сыйға тартып отырған «Жедел-жәрдем» көлігі адамдардың қажетіне жарап, шұғыл медициналық қызмет көрсетуге жәрдемін тигізсе, біздің мақсатымыздың орындалғаны», – деді.
Өңірдегі ірі инвестициялық жоба саналатын «Маревен Фуд Тянь-Шань» еліміз бойынша сапалы өнім өндіруді қамтамасыз етіп қана қоймай, көпшілікті жұмыспен де қамтуда. Компания алдағы уақытта қала тұрғындарына, балалар мен зейнеткерлерге әлеуметтік қолдау көрсетуді жалғастыра бермек. Қазір Алатау қаласында спорт алаңын салу мүмкіндігін қарастыруда.
Алма ЕСЕНБАЙ
Алатау қаласы
