«Тұмаш өлеңдерінің ішкі музыкасы басқаша болғандықтан ба, бұған дейін бес жүзден астам өлеңіне ән жазылды. Қазақ ақындарында ондай көлемде әнге айналған поэзия бар ма, жоқ па, оны білмедім. Осы жағынан келгенде, оның поэзиясы өзгеше өміршең», – деп Тұманбай өлеңдеріне әдебиетші-ғалым Тұрсынбек Кәкішев баға берген екен. Егер сөзі мәнді болмаса, әуеннің жүрекке жетпейтіні анық. Ал Тұмағаңның сөзіне жазылған әндер рухыңды көтеріп, жаныңды тербейді.
Еңбекшіқазақ ауданы Шелек ауылындағы А.Розыбақиев атындағы мектептің мәжіліс залында Қазақстанның Халық жазушысы, Мемлекеттік және Физули атындағы халықаралық сыйлықтардың лауреаты Тұманбай Молдағалиевтің 90 жылдық мерейтойына орай «Жүрегі жырдан жаралған» атты әдеби-сазды кеш өтті. Жиналған көпшілік ақын сөзіне жазылған даңқты композитор Нұрғиса Тілендиевтің «Құстар қайтып барады» әнін «Мұзарт» тобы шырқаған бейнебаяннан тебірене тыңдады.
Кеште қаламгердің көзін көрген жерлестері – құрметті қариялар Елеусіз Сұлтанғазиев, Әбілбек Айтақынов және Нұрлан Мұхаметқалиев ақынның адамгершілік қасиеттерін тілге тиек етті. Ал ауылдық аналар кеңесінің төрағасы Гүлжан Үмекова талант иесі жайлы кеңінен сөз қозғап, әннен шашу шашып, көпшіліктің көңілін бір көтеріп тастады.
Шелек ауылдық округі әкімінің орынбасары Ертай Құрманбаев ұйымдастырушыларға алғыс білдірсе, мектептегі аналар ұйымының төрайымы Банигүл Палтиева қабырғалы қаламгердің халықтар достығын паш еткен «Ұйғырлар» атты өлеңін оқып берді. Одан кейін сөз алған мектеп директоры Чимангүл Амилова: «Тұманбай Молдағалиевтің шығармашылығы қазақ әдебиетінің баға жетпес мұрасы болып саналады. Біз бүгін ақын жырларынан, ұлағатты сөздерінен тағылым алып, есімін қайта жаңғырту мақсатында жиналып отырмыз», – деді.
Кеш соңында мектеп оқушылары өлеңдері мен сөзіне жазылған әндерді нақышына келтіре орындап, қаламгер рухын асқақтатты.
Анарбек БЕРДІБАЕВ
Шелек ауылы, Еңбекшіқазақ ауданы
