Кегендегі балалар мен жасөспірімдер спорт мектебінде еңбек ардагері Бағашар Тоқмолдаевты еске алуға арналған ардагерлер арасында волейбол жарысы өтті.
Турнирдің ашылу салтанатында аудандық «Бұқаралық спорттық іс-шараларды өткізу орталығы» КММ директоры Гайдар Мұқанқожаев ардагердің өмір жолына және қоғамдық жұмыста атқарған еңбектеріне шолу жасай келе, осы іс-шараға мұрындық болған бауырлары мен ұрпақтарына алғыс білдіріп, қатысушыларға сәттілік тіледі.
Спортшылар жеребе арқылы топ-топқа бөлініп, бақ сынады. Турнир қорытындысы бойынша, волейбол жарысында сынға түскен 6 командадан бірінші орынды Қарқара ауылының спортшылары жеңіп алса, екінші орынды Жылысайдың ардагерлері иеленді. Ал үшінші орын Алғабас ауылының командасына бұйырды. Бұдан бөлек, топтан оза шапқан ойыншылар да жүлдеден құр қалмай, түрлі марапатқа ие болды. Сонымен қатар әдемі ойын өрнегімен көрермен көзайымына айналған Нұрлыбек Қоңырқұлжаев «Үздік шабуылшы», Ерболат Сәменов «Үздік қорғаушы» деп танылды, ал жарыстың жоғары дәрежеде өтуіне үлес қосқан Әнуар Мұқалбаев «Үздік ұйымдастырушы» атанды.
Жеңімпаздар мен жүлдегерлерді ардагер-спортшы Ертай Нарынбаев, аудандық қазынашылық басқармасының басшысы Ғайсагүл Омарбекова, Гайдар Мұқанқожаев құттықтап, бұқаралық спорттық іс-шараларды өткізу орталығының дипломдары, медальдары мен кубоктары және бағалы сыйлықтармен марапаттады. Еңбек ардагерінің ұрпақтары Гауһар Бағашарқызы мен Дастан Тоқмолдаев әулеті атынан жарысқа қатысқан спортшылар мен қонақтарға алғысын білдірді.
Осылайша, салауатты өмір салтын насихаттап және аға буынның өнегелі өмір жолын жастарға үлгі ету мақсатында өткен турнир өз мәресіне жетті.
Дәурен ӘБУТӘЛІПОВ
Кеген ауданы
