«Бұлақ көрсең, көзін аш» дегендей, дарынды балалардың өнерін шыңдау әр ұстаздың міндеті деп ойлаймын. Талғар ауданы Ақдала ауылындағы №44 орта мектепте де өнерпаз өрендер аз емес. Солардың бірі – 6 «В» сынып оқушысы Аян Аязбай.
Аян 2023 жылы «Balbulaq» балалар мен жасөспірімдер шығармашылық орталығы ұйымдастырған I республикалық «Жыр алыбы – Жамбыл» атты өнер байқауында «Вокал» номинациясы бойынша бас жүлдені жеңіп алды. Сол жылы республикалық «Жас дарын» орталығы ұйытқы болған «Жырлайды жүрек» байқауында «Эстрадалық ән» аталымы бойынша жүлделі 1-орынды иеленді.
2023-2024 оқу жылында «Жеті өнер» VIII халықаралық шығармашылық фестивалінде топ жарды. Түркия мен Өзбекстанда өтетін конкурстарға жолдама алды. 2024 жылы ҚР Оқу-ағарту министрлігінің «Balbulaq» балалар мен жасөспірімдер шығармашылық орталығы ұйымдастырған V республикалық «Абай оқулары» өнер байқауында «Дәстүрлі ән» номинациясы бойынша бас жүлдені еншіледі. Сонымен қоса былтыр халықаралық «Самға самұрық» байқауында «Дәстүрлі ән» аталымы бойынша Біржан салдың «Он саусақ» әнін орындап, жүлделі екінші орынмен марапатталды.
Талантты оқушымызды өнерге баулып, жетістіктерге жетелеген музыка пәні мұғалімі Гүлзия Мархабаеваның елеулі еңбегін де айрықша бағалаймыз. Жас дарынымыздың әлі талай биік белесті бағындырарына кәміл сенеміз.
Гүлзада Батырханова,
№44 орта мектептің мұғалімі
Талғар ауданы
