Иә, Көкшенің табиғаты тамылжыған Бурабай өлкесінде Ұлттық құрылтайдың төртінші жиыны өтті. Бұл жолы да мемлекеттің дамуы мен халықтың әлеуетін арттыруға бағытталған келелі мәселелер көтерілді.
Мені жұртшылық арасында қызу талқыға түсіп жүрген қосымша құн салығы мөлшерінің артуы алаңдатушы еді. Мемлекет басшысы Қасым-Жомарт Тоқаевтың баяндамасынан осы сауалдардың жауабын естіп, көңілім жай тапқандай болғаны рас. Ол, бұл реттегі бастамаларды тілге тиек ете келіп, Қазақстанның бюджет қаржысының жартысынан көбі әлеуметтік саланың еншісінде екенін жеткізді.
«Біздің еліміз – әлеуметтік мемлекет. Сондықтан білім беру, денсаулық сақтау салаларына инвестиция салуды жалғастырамыз. Бұл – біздің конституциялық міндетіміз. Бірақ шын мұқтаж азаматтарға ғана көмек көрсетілуі керек. Қызметін асыра пайдалануға, алаяқтыққа жол берілмейді. Сондықтан басымдық берілмеген жобаларға бөлінетін қаржы азаяды. Бұл қажет шара екені айдан анық. Үкімет осы жылдың соңына дейін оны қалай оңтайландыру керектігін біржола анықтап алуға тиіс», – деді баяндамасында.
Президент салық жүйесі, бүкіл мемлекеттік жүйенің тірегі екенін айта келіп, бюджетте қаржы болмаса, мемлекет өз міндетін толық атқара алмайтынын, әлеуметтік міндеттемелер де орындалмайтынын алға тартты. Еліміз үшін аса қажет шаралардың мән-маңызын халыққа егжей-тегжейлі түсіндіру керектігіне тоқталды.
«Жұрттың бәрі экономист немесе қаржыгер емес. Мемлекеттің қандай шараны не үшін қолға алып жатқанын бәрі бірдей түсіне бермеуі мүмкін. Сондықтан реформаның мәнін әр адамға түсінікті тілмен жеткізу керек. Үкімет салық реформасына қатысты жаңа тәсілдерді ұсынды. Бұл шаралар, жалпы алғанда, дұрыс. Онда негізгі экономикалық және әлеуметтік факторлар ескерілген», – деді.
Қазақстанда түрлі салық режимі, көптеген жеңілдік пен преференциялар бар екенін, оның бәрі елімізде салық офшоры сияқты ахуал қалыптастыратынын да жасырмады. Соның салдарынан кәсіпкерлердің екі негізгі тобы пайда болған. Біріншісі – заңнамадағы олқылықтарды пайдаланып, табысын өзі үшін азайтып көрсететін болса, екіншісі – салықты адал төлеп жүргендер. Табысын жасыратындардың салдарынан екінші топтағы адал кәсіпкерлер бәсекеге төтеп бере алмай жүргені де жасырын емес. Сол себепті Үкімет пен Парламентке жедел түрде тиісті түзетулерді енгізу қажеттігі айтылды. Бұл – әділетті Қазақстан құру жолындағы нақты қадам деп есептеймін.
Берікбай Қадықов,
жазушы-журналист, Қарасай ауданының Құрметті азаматы
