Еңбекшіқазақ ауданында күштік құрылымдар арасында қазақ күресінен Алматы облысының чемпионаты өтті. Жарысқа облыстық полиция департаментіне қарасты тоғыз ауданның, Қонаев, Алатау қалаларының, Алматы облыстық ПД орталық аппаратының өкілдері, сондай-ақ арнайы жасақ бөлімі мен жол-патрульдік полиция батальонының қызметкерлері қатысты. Барлығы 13 команда, 70-тен астам қатысушы.
Жарыстың ашылуында сөз сөйлеген Алматы облыстық ПД бастығы Мейрам Әбікеев:
«Аталған шара жыл сайын өтетін игі дәстүрге айналды. Осындай спорттық бәсекеде топ жарған жеңімпаздарымыз полиция имиджін көтеруге үлес қосып жүр. Полиция қызметкерлері үшін де бұл бәсекенің пайдасы мол. Ұлттық күрес күш-қуатты, төзімділікті, тактикалық ойлауды дамытады. Жарыстың мақсаты – үстіміздегі жылдың сәуір айында өтетін ҚР ІІМ чемпионатына ең мықты балуандарды іріктеу», – деді.
Алматы облыстық дене шынықтыру және спорт басқармасы ұлттық спорт түрлері бөлімінің басшысы Жасұлан Қалиақпаров та қатысушыларға сәттілік тіледі. Оның айтуынша, аталған жарыс республикалық чемпионатта облыс намысын, сондай-ақ халықаралық додада ел намысын қорғайтын балуандарды баптауға ықпал етеді.
Қазақ күресінде адам өзін еркін ұстап, өз бойындағы күшін, әдісін түгел пайдалана алады, мұнда шалу, жата тастау, арқалай тастау, қол байлап күресу, салмақпен басу, белінен қысып, тірсектен шалу сияқты әдістердің бәрін де қолдануға болады. “Таза жеңіс” – күрес кезінде қарсыластың екі жауырынының кілемге тиюі әсерінен болған әдіс.
Жарыс барысында қазақ күресінен Азия чемпионы, самбодан үш дүркін әлем чемпионы, дзюдо, самбо және қазақ күресінен спорт шебері Жігер Сәкенұлы қарсылас шақ келтірмей, облыс біріншілігінің «Түйе палуаны» атанды.
«Мен ең алдымен самбо және дзюдомен айналыстым. Қазір қазақ күресіне ауыстым. Маған бұл спорт түрі ұнайды. Әрине, спортта әлсіз қарсылас болмайды. Әрқайсысы құрметке лайық. Турнирде жеңімпаз атануыма тәжірибе көп пайдасын тигізді. Полиция қызметкерлері арасында бұл жарыстың дәстүрге айнала бастағаны қуантады, – деді Жігер Сәкенұлы.
Жарыс 66 келіден +100 келіге дейін олимпиадалық жүйе бойынша өтті. Командалық бәсекеде бірінші орынды Алматы облыстық ПД иеленді, екінші орын Еңбекшіқазақ аудандық полиция басқармасына бұйырды, ал үшінші орынды Талғар аудандық полиция басқармасының өкілдері алды.
Өз тілшіміз
Еңбекшіқазақ ауданы
