Жамбыл ауданы Ақтерек ауылында тұратын Жәмила Есімова –қолөнер шебері. Осындағы орта мектепте көркем еңбек пәнінен сабақ беретін мұғалім жүннен бұйым жасаудың қыр-сырын кәсіби тұрғыда меңгеріп, білгенін жастарға үйретуден жалықпайды.
Ол ұлттық қолөнердің мәртебесін көтеріп, заманауи бағытта дамытуды алдына мақсат еткен жан. Жүнмен жұмыс істеуді алғаш 2004 жылы жоғары оқу орнын бітірердегі диплом жұмысынан бастапты. Қазір шебердің бөлмесі қолөнер туындыларына толы. Киізден, жүннен заманға сай әртүрлі ойыншық, сөмке, бас киім, кеудеше, аяқкиім, сырмақ, қолсөмке, көрпе-жастық, бөстек, кәдесый, гүл, қуыршақ, басқа да дүниелер сөреде сықасып тұр. Пән кабинетінің бір жақ қабырғасын тұтас алып тұрған Алғыс хат, грамота, сертификат сияқты куәландыру құжаттары ұстаз еңбегін әйгілейді. Ол «Технология пәнін оқыту әдістемесі», «Жүн бұйымдарының технологиясы» кітаптарының авторы, осы тақырыпта 4 электрондық оқулығы бар.
Жәмила Керімшеқызы Ақтерек орта мектебінде 15 жылдан бері «Сән шеруі» байқауын тұрақты ұйымдастырып келеді. Қолөнерді меңгерген 20-дан астам оқушысы мектептен кейін «Сымбат» сән академиясына, Алматы сервис және жаңа технологиялар колледжіне грантқа оқуға түскен. Шәкірттерінің алды жеке кәсіптерін ашып, ісін табысты жүргізуде. Соның бірі Айкерім Мамыт Жүргенов атындағы Өнер академиясын үздік аяқтады, танымал дизайнер, қазір өз брендін қалыптастыруда.
Білікті ұстаз «Этностильдік бұйымдар» тақырыбында авторлық бағдарлама жазып, соның аясында жастарды ұлттық өнерге баулып келеді. «Оқушылар ою-өрнектің ежелгі нұсқалары мен атауларын, теориясын, маңызын, композициялық құрылымын біліп, өздігінен ою-өрнек жасауды игереді. Сабақтан үйренгенін тереңдетіп, өмірде қолдана алады», – дейді мұғалім.
Ол оқушылардың шығармашылық қабілетін дамыту мақсатында ақысыз, ерікті түрде «Киіз» үйірмесін жүргізеді. Үйірмеде орындалған жұмысты көрмелерге шығарады. Қазақ халқының тұрмыс-тіршілігінде малдың жүні ежелден үлкен маңызға ие. Оны ұқсатуды бабаларымыз бұдан мыңдаған жыл бұрын білген. Жәмила негізінен қой жүнін қолданады. Бұл – қолмен атқарылатын шығармашылық жұмыс. Өрнектің қандай болатыны шебердің сол сәттегі ой-қиялына байланысты. Жүн – экологиялық таза материал екенін айтады ол. Әлемде қазір экоматериалдан бұйым жасау трендте. Киіздің ерекшелігі салқында суықтан, ыстықта күннен қорғайды. Дене температурасын бірқалыпты ұстайды. Дәрігерлер оны бел құяңын емдеуге де ұсынады. Бұрын жарақатқа киіз күйдіріп басатын болған. Өйткені қой жүнінің құрамында ланолин табиғи майы бар, ол жарақаттың тезірек жазылуына әсер етеді.
Ұлттық құндылықтарды бала бойына өнер арқылы сіңіруді басты мұрат санаған Жәмила Есімова аудан, облыс, республика деңгейінде көптеген марапат алған, Еуразиялық дизайнерлер одағының мүшесі, Ұлттық дизайн академиясының академигі, «Қазақстанның Құрметті педагогы», «Ұлағатты ұстаз», «Үздік ұстаз», «Қазақстан патриоты» төсбелгілерінің иегері. Бұл күндері ол Түркияда өтетін Наурыз мерекесіндегі қолөнер көрмесіне қатысу үшін Қазақстан делегациясының құрамында Ыстамбұл қаласында жүр.
Серік САТЫБАЛДИЕВ,
Жамбыл ауданы
