Облыс әкімі Марат Сұлтанғазиев жұмыс сапарымен Жамбыл ауданының Үлкен
ауылдық округіне барып, әлеуметтік және инфрақұрылымдық нысандарды аралады.
Сапар барысында аймақ басшысы ауылды жандандыру мен инфрақұрылымды
жақсарту бойынша нақты тапсырмалар берді.
Әкім «Әбілқайыр» ЖШС-на қарасты балық зауытының жұмысымен танысты. Зауыт директоры Ринат Мурзалиевтің айтуынша, кәсіпорын жылына бірнеше тонна балық өңдеп, ішкі нарықты сапалы өніммен қамтамасыз етеді. Марат Елеусізұлы өндіріс орнының әлеуетін жоғары бағалап, ауыл шаруашылығын дамыту бағытындағы бастамаларды қолдайтынын жеткізді. «Ауыл шаруашылығын дамыту – біздің басты міндетіміздің бірі. Осындай өндіріс орындары халықты жұмыспен қамтып қана қоймай, экономикалық өсімге ықпал етеді», – деді облыс әкімі.
Үлкен ауылындағы су жинау торабының жұмысымен де танысты. «Жамбыл Су» МКК басшысы Арман Кемелбеков су тазарту қондырғысының мүмкіндігі мен технологиялық процесі туралы баяндады. Сонымен қатар ауылдық амбулаторияның құрылыс жұмысын көрді. Мұнда облыстық құрылыс басқармасының басшысы Мұхамедғаріп Құрманғалиев нысанның қазіргі жағдайы туралы ақпарат берді. Әрі қарай бұрынғы балабақша ғимаратының жай-күйімен танысты.
Марат Сұлтанғазиев нысандарды тиімді пайдалану бойынша тиісті атқарушы орган басшыларына ұсыныс әзірлеуді тапсырды. Орынбасары Әсет Масабаевқа ауылдағы ғимараттардың жағдайын жан-жақты тексеріп, сәулет және құрылыс басқармаларымен бірлесіп, жөндеу жұмысын ұйымдастыруды жүктеді. «Ауылдағы барлық ғимараттың жағдайын мұқият қарап, қажетті жөндеу жұмысын жүргізу керек. Бұл – тұрғындардың өмір сүру сапасын жақсартуға бағытталған маңызды қадам», – деді.
Жұмыс барысында облыс әкімі туризмді дамыту мәселесіне ерекше көңіл бөліп, жағажай аймағын ретке келтіруді тапсырды. Абаттандыру шаралары арқылы өңірдің туристік әлеуетін арттыру көзделіп отыр. Су жүйелерін жаңғырту мен жол салу мәселесі де аймақ басшысының назарынан тыс қалмады. Жауапты тұлғаларға ауылдағы су жүйелерін қайта қарап, жол инфрақұрылымын жақсартудың нақты шараларын қабылдауды міндеттеді. Сондай-ақ Үлкен ауылындағы тұрғын үйлердің жағдайына баса назар аударды. Қазір елдімекендегі 1200 пәтердің 600-інде тұрғындар тұрып жатыр, бос тұрған 500 пәтерге қайта қоныстандыру жоспарлануда. Әкім бұл мәселені шешу үшін кешенді жұмыс жүргізуді тапсырды. Жамбыл ауданының әкімі Нұрлан Ертасқа ауылды жандандыру және тұрғындарға қолайлы жағдай жасау бағытында нақты шаралар қабылдау жүктелді.
Облыс әкімі ауылдың орталық аллеясында зиялы қауым өкілдерімен кездесті. Жергілікті тұрғындар өзекті мәселелерді көтеріп, ұсыныстарын жеткізді. «Халықтың талап-тілегін ескеріп, ауылды дамытуға бағытталған жобаларды іске асыруға күш саламыз. Сапалы инфрақұрылым мен әлеуметтік нысандар – тұрғындардың әл-ауқатын арттырудың басты факторы», – деп атап өтті облыс әкімі.
Сапарының соңында жергілікті атқарушы органдарға нақты тапсырмалар берді.
Серік САТЫБАЛДИЕВ,
Жамбыл ауданы
