Өзбекстанда 20-дан астам елден 700-ге жуық спортшы қатысқан әлем чемпионаты өтуде.
Олардың арасында Алматы облысы Кеген ауданының төтенше жағдайлар бөлімінің аға инженері, азаматтық қорғау лейтенанты Қадыр Дәурен гір тасын көтеру бәсекесінде ересектер арасында 68 салмақта ІІ орын иеленіп, күміс медальді қанжығасына байлады. Қазақстан республикасының спорт шебері негізі бұл сайысқа толыққанды дайындықпен барғанын, жеңіске қол жеткізу кезінде 2 ұпай жетпей қалғанын айтады. 21 жастағы спортшы бұған дейінде Қырғыз елінде 25 елдің 800-ден астам спортшысы қатысқан әлем чемпионатында осы спорт түрінен күміс жүлдеге ие болған. 4 жылдан бері республикалық, облыстық жарыстарға қатысып келе жатқан жеңімпаз сайыстардан жүлделі орынсыз оралмаған. Айта кету керек, жас спортшы қазақ күресімен шұғылданып, Қазақстан біріншілігінің қола медалін иемденген. Мәлік Ғабдуллин академиясында өрт қауіпсіздігі мамандығы бойынша білім алып, оны үздік бітірген түлек ҚР Төтенше жағдайлар министрі Шыңғыс Әріновтың қолынан алғашқы арнайы лейтенант шенін алған. Алдағы уақытта осындай әлемдік аренадағы байрақты бәйгелерде өз намысын бермей, жүлдегер атанатынына сенімді.
Алматы облысының ТЖД баспасөз қызметі
