Қасиетті Қарасай жерінің өсіп-өркендеуі жолында еңбегін елге арнаған азаматтар аз емес. Олардың әрбірі – әр саланың тұтқасын ұстап, кейінгі ұрпаққа өнегелі істерімен үлгі болып, халық алдында сый-құрметке бөленіп жүрген жақсы жандар. Солардың арасында есімін ерекшелеп айтатын, қайсар мінезді, жарқын жүзді, Қарасай ауданының Құрметті азаматы Сәкен Шаймолдаевты айрықша атап өтуге болады.
Ұзақ жыл құқық қорғау жүйесінде еңбек еткен арда азамат асқаралы алпыс жастың асуына шалдықпай, шаршамай жетіп отыр. Азаматтық келбеті, еңбекқорлығы, өз ісіне деген жауапкершілігі, тиянақтылығы өз алдына бір төбе. Сәкен аға осынау мерейлі жасқа дейін әрдайым абырой биігінен көрініп, қызметтік бағытында талай жетістікке жетті. 1965 жылдың 1 сәуірінде Алматы облысына қарасты Жамбыл ауданының Жангелді ауылында дүниеге келген ол 1982 жылы осы өңірдің Рославль кеңшарында орта мектепті аяқтап, бір жыл қой бағып, ауылдағы әкесіне қолғабыс еткен. Одан кейін Кеңес әскерінің қатарында болып, Германия еліне әскери борышын өтеуге аттанған. Мұнда екі жыл іс басқарушы ретінде әскери міндетін орындап, 1985 жылы Отанына оралды. Осы жылы Алматы қаласындағы Ауыл шаруашылығы институтының инженер-механик факультетіне оқуға түседі. Дәл осы оқу ордасында білім алып жүріп 1986 жылы Желтоқсан көтерілісіне қатысқан. Жастармен бірге елдің ертеңі үшін алаңдап, қайсар қыз-жігіттердің ортасынан табылып, белсенділік танытып жүргенде әскерилердің соққысына жығылған. Алайда ол рухын жоғалтпай, намысшыл қазақ жастарымен бірге мемлекеттің тәуелсіздігі үшін басын бәйгеге тікті.
Студент Сәкен оқу ордасында көшбасшылардың бірі ретінде қоғам белсендісі, комсомол прожекторы болып, белсенді білімгерлердің қатарынан табылды. 1990 жылы инженер-механика маманы атанды. Осы жылы жолдама арқылы Алматы облысы Кеген ауданындағы Тоғызбұлақ ұжымшарында механик ретінде алғаш еңбек жолын бастады. Оның жұмысқа деген адалдығы, әрбір іске жауапкершілік танытуы басшылықтың сеніміне және жоғары бағасына ие болды. Осылайша гараж меңгерушісі, бас инженер сияқты жауапты міндеттерді орындап, жоғары қызметтерді абыроймен атқара білді.
Сәкен Қырғызалыұлының қызыққа әрі тосын оқиғаға толы, жемісті жетістікке ұласқан еңбек жолының біразы құқық қорғау саласында өтті. Техника маманы болғандықтан, бұл жауапты қызметті 1993 жылы ҚР Ішкі істер министрлігінің шақыртуымен Бас басқарма жол полициясының аға инспекторы ретінде бастады. 1997 жылы Алматы облысы ішкі істер департаменті жол полициясы басқармасының штабына бас маман болып орналасты. Сәкен Шаймолдаев осындай қырағылық қажет жұмысты атқара жүріп, өз білімін жетілдіруді де ұмытқан жоқ. 2003 жылы Алматыдағы Абай атындағы Қазақ ұлттық педагогикалық университетінің заң факультетін бітірді. Ал 2005 жылы Қарасай ауданының ішкі істер басқармасының әкімшілік-тәжірибе бас маманы, одан кейін 2009 жылы Қарасай ауданы жол полициясының бастығы, 2013 жылы аталмыш органның қоғамдық тәртіп жөніндегі бастықтың орынбасары қызметін атқарды.
Осындай түрлі басшылықта жұмыс істеген Сәкен Қырғызалыұлы әрдайым ерен еңбектің үлгісін көрсете білді. Оның ішкі істер саласындағы қызметі ширек ғасырға жетіп, 2015 жылы еңбек өтілінің 25 жыл толуына байланысты құрметті демалысқа шықты. Сәкен аға зейнеткер болса да осы уақытқа дейін аудан көлеміндегі қоғамдық жұмысқа белсене араласып, патриоттық және ұрпақ тәрбиесі бағытындағы түрлі іс-шарадан қол үзген емес. Әсіресе, Тәуелсіздік мерекесі аясында Желтоқсан ардагері ретінде мектеп, колледж, университет сияқты білім ошақтарындағы талай кездесуде бой көрсетіп, жастарға ағалық ақылын, өсиеттерін айтып келеді.
Сәкен Қырғызалыұлының еңбегі ешқашан ескерусіз қалмаған. Құқық қорғау саласында атқарған қалтқысыз қызметі үшін «Ішкі істер органдарының үздігі» атанып, «Желтоқсан ардагері», «Желтоқсан қаһарманы», «ҚР Патриоты», «Егемен ел патриоты», «Қазақстан полициясына – 30 жыл», «ҚР Тәуелсіздігіне – 25 жыл», «ҚР Тәуелсіздігіне – 30 жыл» сияқты түрлі сипаттағы медальдардың иегері болды. Сондай-ақ Президенттің, ҚР Ішкі істер министрлігінің, Алматы облыстық ішкі істер департаментінің, Қарасай аудандық ішкі істер басқармасының, Алматы облысы әкімінің, Қарасай ауданы әкімінің және Алматы облыстық Азаматтық альянсы төрағасының Алғыс хаттарымен марапатталған. Ерекше атап өтер тағы бір жетістігі әрі еңбегінің бағалануы – «Қазақстанның 100 жаңа есімі» жобасына есімінің енуі.
Тағы бір айта кетерлігі, ардақты азамат қызмет жолында Қарасай ауданының әлеуметтік-экономикалық дамуына сүбелі үлес қосып, өңірдің өсіп-өркендеуі үшін еңбегін аянып қалмады. Зейнет жасында болса да, осы ауданның тыныс-тіршілігіне араласып келеді. Сәкен ағаның осынау ізгі қасиеттері аудан басшылығы тарапынан ескеріліп, оған 2020 жылы өңірлік мәслихат шешімімен «Қарасай ауданының Құрметті азаматы» атағы берілді. Одан бөлек 2023 жылы «Bilim оrkenieti» ұлттық инновациялық ғылыми-зерттеу орталығының ұйымдастыруымен республикалық байқауда бағы жанып, «ҚР Құрметті азаматы» атағын жеңіп алды. Бұл да оның қызметінің жемісі әрі жеңісі деп білеміз.
Ғұмыр жолында өз саласында жетістікке жетіп, мемлекеттің дамуына бір адамдай үлес қосып, патриоттық қасиетімен дараланған Сәкен ағаның сара жолы үлгі аларлық. Сондықтан ізгіліктің жолында атқарған ізгі істері кейінгі жас ұрпаққа жазба ретінде қалса, артық болмас. Осы ретте Сәкен Қырғызалыұлының қаламынан туған патриоттық негізде жеке кітабы шыққанын айтуға болады. «Сәкеннің сара жолдары» деп аталатын рухани құндылықта оның өмір мен еңбек жолдары, қалтқысыз қызметіне қатысты айқын ақпараттар қамтылған. Автордың кітабынан бөлек, арнайы деректі фильм де жарық көрді. Бұл туындыда Сәкен ағаның ғұмырнамасы мен қызметінен сыр шертіледі.
Осындай жетістіктерімен дараланып, ел алғысына бөленіп жүрген Сәкен Шаймолдаев, міне, енді 60 жастың асқарына шығып отыр. Өз ісіне деген адалдығы, азамат ретінде адамдығы, қайсар мінезді, өр рухты кісілік келбеті көпке үлгі десек, артық айтқандық емес. Орнықты отбасының тірегіне айналған, достарымен сыйластығы жарасып, әріптестерінің арасында абыройы артқан Сәкен Қырғызалыұлына тек жақсылық тілейміз. Ғұмыры ғибратты, ұрпағымен қымбатты, ағалық ақылымен сымбатты болып, бақ-беделі арта берсін демекпіз.
Дидар МӘЛІКҰЛЫ
