Қазіргі таңда елімізде ұлттық ойындарды қайта жандандырып, оны оқу және тәрбие үрдісінде пайдалану бойынша жұмыстар жүргізілуде. Әсіресе бұл бағытта мектеп және мектепке дейінгі мекемелер белсенділік танытып келеді. Соның бірі – Қарасай ауданы Қырғауылды ауылындағы «Ақ көгершін» балабақшасы.
Аталған мекемеде бестемше ұлттық ойынынан мектепке дейінгі білім беру ұйымдарының педагогтері арасында облыстық турнир өтті.
Алматы облыстық дене шынықтыру және спорт басқармасы ұйымдастырған жарыста Қонаев қаласы және облыстағы жеті ауданның балабақша тәрбиешілерінен құралған сегіз команда бақ сынасты. Турнирдің облыстық кезеңі өте тартысты өтті. Қатысушылардың логикалық ойлауы, тапқырлығы мен шыдамдылығы ерекше байқалды. Жарыс нәтижесінде Балқаш ауданының тәрбиешілері оза шауып, жүлделі I орынды иеленді. Ал ІІ орынды Еңбекшіқазақ ауданы жеңіп алса, Қарасай ауданының тәрбиешілері ІІІ орынға ие болды.
Шара соңында жеңімпаздар мен жүлдегерлер арнайы диплом, кубок, медальдармен марапатталды. Сондай-ақ турнирді ұйымдастыруға, оның жоғары деңгейде өтуіне үлестерін қосқан балабақшалардың меңгерушілері Алматы облыстық білім басқармасы дене тәрбиесі, спорт, алғашқы әскери дайындығы және қосымша білім берудің ғылыми-тәжірибелік орталығының директоры К.Берікболовтың Алғыс хатымен марапатталды.
Ақтоты МЫРЗАБЕКҚЫЗЫ
