Балқаш аудандық кітапханасында Қазақстанның Құрметті журналисі, Халықаралық Жазушылар одағының мүшесі, Іле ауданының Құрметті азаматы Шынәділ Мұқанұлының «Балқашым – қамал түбегім» және «Қырбастың қызылы» атты кітаптарының тұсауы кесіліп, оқырман қауымға жол тартты.
Қаламгердің 75 жасқа толуына орай ұйымдастырылған шарада аудандық мәдениет, тілдерді дамыту, дене шынықтыру және спорт бөлімінің бас маманы Гүлзат Сәлімжанова бақ дарыған Балқаштың қасиетті топырағынан нәр алып, мәдениет саласына өзіндік үлес қосып келе жатқан мерейтой иесіне игі тілегін арнады.
Келесі кезекте сөз алған Қонаев қаласының және Балқаш ауданының Құрметті азаматтары Ізтілеу Тойшыбайұлы мен Зарыққан Есілбаев ақынның қаламынан туған құнды дүниелердің келешек ұрпаққа рухани азық болатынын сөз етті. Шынәділ Мұқанұлының «Қазақстанның Құрметті азаматы» байқауына қатысып, жеңімпаз атанғанын және Алматы облысының «Құрмет кітабына» есімі енгенін тілге тиек етіп, қаламгердің иығына шапан жапты. Сондай-ақ ақынның замандастары Ақынбек Станбеков, Марат Қашқынбаев, Мұқанғали Қожабеков және Самат Рақышев жүрекжарды лебіздерін білдірді.
Мәдени шарада аудан өнерпаздары Айбын Батырбаев пен Алмабек Садықов әуелете ән шырқады. Бақанас мектеп-интернатының оқушылары ақын өлеңдерін мәнерлеп оқыса, Ақши ауылдық Мәдениет үйінің әншісі Ғылымжан Жеңісұлы Шынәділ Мұқанұлының сөзіне жазылған «Туған жер, сені сағындым» және «Күнім – айым» атты әндерін тамылжыта орындап, көпшіліктің ыстық ықыласына бөленді.
Мәдени шараны қорытындылаған мерейтой иесі алғаш қолына қалам алған балалық шағынан естеліктер айтып, жаңа кітаптарының таныстырылымы өзінің туған өңірінде өтіп жатқанына ризашылығын білдіріп, аудандық кітапхана ұжымына алғыс білдірді.
Бақтығали ДӘУІТБАЕВ
Балқаш ауданы
