Дүниежүзілік денсаулық күніне орай Қонаев қаласындағы Б.Соқпақбаев атындағы орталық саябақта «Walk the Talk» спорт акциясы өтті. Жүгіруден бүкіл әлемді қамтитын спорт шарасы 2018 жылдан бері ұйымдастырылып келеді. Акцияға ҚР Денсаулық сақтау министрлігі мен Дүниежүзілік денсаулық сақтау ұйымы бастамашы болды.
«Аталған шара салауатты өмір салтын насихаттауға арналған. Мәселен, 2023 жылы Женевада өткен халықаралық акцияға 7000 адам қатысқан екен. Ал 2024 жылы қатысушылар саны 8000-ға жеткен. Бұл халықтар арасында дене шынықтыру мен спортқа деген қызығушылықтың артып келе жатқанын көрсетеді. Ғалымдардың зерттеуінше, екі жыл бойы аптасына үш рет 5000 қадам жасаған адамның өмірі үш жылға ұзарады екен. «Қозғалыс – бұл өмір» деген сөз бекер айтылмаған. Сондықтан үнемі спортпен шынығып, денсаулықты нығайтуға атсалысайық», – деді облыстық дене шынықтыру және спорт басқармасы басшысының орынбасары Әлімбек Тәжеков.
Шағын марафонға 25-45 жас аралығындағы облыстық денсаулық сақтау басқармасының қызметкерлері қатысты. Әйелдер – 1,6 км, ал ер адамдар 3 км қашықтыққа жүгірді.
«Дәрігер-терапевт ретінде айтарым, салауатты өмір салтын ұстану, дұрыс тамақтану, физикалық белсенділік, темекі мен ішімдік сияқты зиынды заттардан аулақ болу – түрлі аурудың алдын алады. Мен бала кезден футболмен айналыстым. Қазір жасым отызға келсе де спортпен шынығуды тастаған жоқпын. Жүгіруді күнделікті әдетке айналдырдым. Осы тектес жарыстардан қалмауға тырысамын. Санаулы күндерден кейін Алматы марафоны басталады. 10 км қашықтыққа жүгіруден де бағымды сынап көрсем», – дейді ерлер арасында жеңімпаз атанған Алмас Әсенов.
Әр атқан таңын жүгіруден бастайтын Маржан Қуанышбаева да әйелдер арасында топ жарды.
«Жүгірумен айналысып жүргеніме көп болмады. Бірақ осы уақыт ішінде оның денсаулыққа пайдалы екенін анық сезіндім. Күні бойы сергек жүресің, көңіл-күйің көтеріліп, күш-қуатың артады. Осындай спорт шарасын ұйымдастырған облыстық дене шынықтыру және спорт басқармасына, облыстық дене шынықтыруды және спортты дамыту орталығына айтар алғысымыз шексіз», – деді Маржан Қуанышбаева.
Жеңімпаздар мен жүлдегерлерге арнайы дипломдар мен медальдар табысталды.
