Мемлекет басшысы Қасым-Жомарт Тоқаевтың тапсырмасына сәйкес, тұрғындарды баспанамен қамтамасыз ету ісі сәтті жалғасын табуда. Өнеркәсібі дамыған Іле өңірі бүгінде қарқынды құрылыс алаңына айналып, көптеген отбасының баспаналы болуына мүмкіндік ашылуда. Соның бір дәлелі – Өтеген батыр ауылындағы котедж қалашығында 10 көпбалалы отбасына пәтер кілтінің табыс етілуі.
Айтулы шараға аудан әкімі Қайыржан Жақсымбетов қатысып, қоныстой иелерін баспаналы болуымен құттықтады.
«Баспана – әрбір отбасының бақыт мекені. Бүгінде ие болып жатқан шаңырақтарыңыз тек шаттыққа толып, үйдің ішінде балалардың сыңғыр күлкісі ғана естілсін. Баршаңызды қоныстарыңызбен құттықтаймын! Жаңа баспаналарыңыз татулық пен берекенің ордасы болып, қуаныш пен бақыт, құт пен ырыс салтанат құрсын!» – деді.
Баспаналы болған азаматтардың қатарында 10 жыл кезекте тұрған 7 баланың анасы Бақытгүл Қоянбаява бар. Ол: «Бүгін – біз үшін ерекше күн. Көптен күткен баспанамызға қол жеткізіп, жаңа қоныс иесі атанып отырмыз. Осы қуанышты сәтті сыйлаған басшыларға, құрылыс жұмыстарына атсалысқан барлық азаматқа алғысымыз шексіз. Осынау үлкен қуанышқа қол жеткізуіміз сіздердің еңбектеріңіздің арқасы. Халықтың жағдайын жақсарту жолында жасап жатқан жұмыстарыңызға сәттілік тілейміз. Бізді қуантып, бақытымызға ортақтасып отырған сіздерге мың алғыс! Жаңа қонысымыз құтты болсын! Осы шаңырақта тек қуаныш, береке орнасын!» – деді.
Әкімдік тарапынан үйлі болған азаматтарға сый-сияпат ретінде кір жуатын машина және балаларға оқу құралдары табыс етілді.
Жалпы алдағы уақытта Өтеген батыр ауылында тұрғын үй кезегінде тұрған халықтың әлеуметтік осал тобындағы 200-ге жуық азаматқа пәтер беру жоспарлануда. Бүгінгі таңда Өтеген батыр ауылында үш 72 пәтерлі тұрғын үйдің құрылысы аяқталуда. Бұл үйлер «Тұрғын үй-коммуналдық инфрақұрылымды дамытудың 2023-2028 жылдарға арналған тұжырымдамасына» сәйкес «Отбасы банкі» арқылы тұрғын үй кезегінде тұрған азаматтарға беріледі.
Айта кетер болсақ, ауданымызда 5443 адам баспана кезегінде тұр. Алдағы уақытта кезең-кезеңімен үй кезегінде тізімде тұрған азаматтар өз баспаналарына қол жеткізбек.
Бағдат ШОЙБАС
Іле ауданы
