Өткен жылы облыстағы бірқатар саяжай елдімекенге қосылды. Бұған дейін өңірдегі саяжайларға елдімекен мәртебесі берілмегендіктен инфрақұрылым, инженерлік желілер тарту, мектеп, балабақша, емхана сынды әлеуметтік нысандар салу мүмкін болмады. Бұл мәселе ондағы жұртты әуре-сарсаңға салып келген еді. Енді, міне, ол іс те оң шешімін таба бастады.
Алматы облысында барлығы 674 саяжай алабы бар. Атап айтсақ, Қарасай ауданында – 200, Іле ауданында – 157, Талғар ауданында – 152, Еңбекшіқазақ ауданында – 135, Жамбыл ауданында – 21, Қонаев қаласында 9 саяжай орналасқан. 2023 жылы Алматы облысындағы 333 саяжайды жақын маңдағы елдімекендерге қосудың Бас жоспары жасалды. Ал 2024 жылдан бері Қарасай ауданының аумағына қарасты саяжайларды елдімекендердің құрамына қосу бағытында белсенді жұмыс жүргізіле бастады. Нәтижесінде былтыр ауданда 101 саяжай алты елдімекенге қосылды. Аудандық сәулет және қала құрылысы бөлімінің мәліметіне сүйенсек, 2024 жылға арналған бюджеттік өтінім бойынша саяжайлық қоғамдастықтары бар елдімекендердің тізбесі жасалып, облыстық сәулет және қала құрылысы басқармасына бюджеттік өтінім жіберілген. Құжат қабылданып, қаражат бөлінген соң, аталған саяжайлар шекара құрамына енгізіліп, оларға елдімекен атауы беріле бастаған. Енді елдімекен мәртебесін алған саяжайлардың аумағында мектеп, балабақша, аурухана, жолдарды жөндеу мен көшелерді жарықтандыру, орталықтандырылған ауызсу мен табиғи газ тарту мәселесін шешу жолдары қарастырылмақ.
Ермұрат Мұқырбай
Қарасай ауданы
