Табиғатқа инвестиция: Есік көлін жаңарту жобасы басталады

Алматы облысы аумағындағы «Есік көлін» жаңарту мақсатында, 2024 жылдың 20 желтоқсанында мемлекеттік тендер өткізіліп, нәтижесінде 49 жыл мерзімге «Хабель» ЖШС компаниясына сенімгерлік басқаруға берілді. Бұл туралы Өңірлік коммуникациялар алаңында өткен баспасөз маслихатында мәлім болды.
– Жеке инвестиция көлемі 23,6 миллиард теңгені құрап, 150 жаңа жұмыс орны ашу жоспарланып отыр. 5 жыл ішінде бөгетті нығайту, техникалық сараптама жүргізу, жобалау-сметалық құжаттама дайындау және қалпына келтіру шаралары жасалады, – дейді Алматы облысы қаржы басқармасы басшысының орынбасары Анар Ақшолақова.
Сонымен қатар, жоба нысанның инженерлік сенімділігін арттырумен қатар, туристік ағынды ұлғайтуға ықпал ететін жаңа мүмкіндіктер береді. Яғни, телекоммуникациялық мұнаралар орнату, қоғамдық тамақтану пункттерін ашу және модульдік тұрғын үйлер салу жоспарланған.
Жоба аймақ үшін ғана емес, бүкіл ел үшін маңызды «Есік көлі» аумағында табиғатпен үйлескен заманауи экотуристік орта қалыптастыру – негізгі мақсаттың бірі. Бұл ретте, экологиялық туризм, мәдени-танымдық іс-шаралар, заманауи инфрақұрылым, бір-бірімен үйлестіріледі”, — деді Әділжан Хабиев.
Оның айтуынша, 1998 жылдан бері «Есік көлі» тазартылмаған. Экологиялық тазарту және селден қорғау инфрақұрылымын қалпына келтіру жұмыстарына шамамен 11,4 млрд теңге бағытталады.
Есік көліндегі бөгетті қайта жаңғырту жұмыстары – гидротехникалық құрылыстың қауіпсіздігін арттырумен қатар, өңірдің туристік әлеуетін дамыту жолындағы маңызды қадам.
Аталған жоба нысанның инженерлік сенімділігін күшейтіп қана қоймай, аймаққа туристерді тартудың жаңа мүмкіндіктерін ашады. Жаңартылған инфрақұрылым Есік көлінің тартымдылығын арттырып, өңірдің экономикалық дамуына оң ықпал етпек.